kya yaqin aur kya guman chup rah

kyā yaqīñ aur kyā gumāñ chup rah

shaam kā vaqt hai miyāñ chup rah

ho gayā qissa-e-vajūd tamām

hai ab āġhāz-e-dāstāñ chup rah

maiñ to pahle hī jā chukā huuñ kahīñ

tū bhī jānāñ nahīñ yahāñ chup rah

tū ab aayā hai haal meñ apne

jab zamīñ hai na āsmāñ chup rah

tū jahāñ thā jahāñ jahāñ thā kabhī

tū bhī ab to nahīñ vahāñ chup rah

zikr chheḌā ḳhudā kā phir tū ne

yaañ hai insāñ bhī rā.egāñ chup rah

saarā saudā nikāl de sar se

ab nahīñ koī āstāñ chup rah

ahrman ho ḳhudā ho yā aadam

ho chukā sab kā imtihāñ chup rah

darmiyānī hī ab sabhī kuchh hai

tū nahīñ apne darmiyāñ chup rah

ab koī baat terī baat nahīñ

nahīñ terī tirī zabāñ chup rah

hai yahāñ zikr-e-hāl-e-maujūdāñ

tū hai ab az-guzishtagāñ chup rah

hijr kī jāñ-kanī tamām huī

dil huā 'jaun' be-amāñ chup rah

kya yaqin aur kya guman chup rah

sham ka waqt hai miyan chup rah

ho gaya qissa-e-wajud tamam

hai ab aaghaz-e-dastan chup rah

main to pahle hi ja chuka hun kahin

tu bhi jaanan nahin yahan chup rah

tu ab aaya hai haal mein apne

jab zamin hai na aasman chup rah

tu jahan tha jahan jahan tha kabhi

tu bhi ab to nahin wahan chup rah

zikr chheDa KHuda ka phir tu ne

yan hai insan bhi raegan chup rah

sara sauda nikal de sar se

ab nahin koi aastan chup rah

ahrman ho KHuda ho ya aadam

ho chuka sab ka imtihan chup rah

darmiyani hi ab sabhi kuchh hai

tu nahin apne darmiyan chup rah

ab koi baat teri baat nahin

nahin teri teri zaban chup rah

hai yahan zikr-e-haal-e-maujudan

tu hai ab az-guzishtagan chup rah

hijr ki jaan-kani tamam hui

dil hua 'jaun' be-aman chup rah