kya ye maqtul ki aulad ki tauhin nahin

kyā ye maqtūl kī aulād kī tauhīn nahīñ

ek bhī shaḳhs bhare shahr meñ ġhamgīn nahīñ

dostī vaj.h-e-aziyyat bhī huā kartī hai

jaise maiñ tere liye bā.is-e-taskīn nahīñ

maiñ ne din-rāt ko har rang meñ Dhalte dekhā

koī ruḳh vaqt kī tasvīr kā rangīn nahīñ

ajnabī soch ke aanā mirī miTTī kī taraf

kurra-e-arz kā har mulk filistīn nahīñ

roz lagte haiñ bhale mujh ko hazāroñ chehre

dil kī taklīf kā baa.is koī do tiin nahīñ

kuchh taġhayyur meñ agar hai to dikhā āñkhoñ ko

zindagī maiñ tire din-rāt kā shauqīn nahīñ

kya ye maqtul ki aulad ki tauhin nahin

ek bhi shaKHs bhare shahr mein ghamgin nahin

dosti wajh-e-aziyyat bhi hua karti hai

jaise main tere liye bais-e-taskin nahin

main ne din-raat ko har rang mein Dhalte dekha

koi ruKH waqt ki taswir ka rangin nahin

ajnabi soch ke aana meri miTTi ki taraf

kurra-e-arz ka har mulk filistin nahin

roz lagte hain bhale mujh ko hazaron chehre

dil ki taklif ka bais koi do tin nahin

kuchh taghayyur mein agar hai to dikha aankhon ko

zindagi main tere din-raat ka shauqin nahin