kya zaruri hai ki bas shor-o-shaghab mein raha jae

kyā zarūrī hai ki bas shor-o-shaġhab meñ rahā jaa.e

bhiiḌ ke saath chaleñ aur aqab meñ rahā jaa.e

mujh meñ dariyā mirā kyoñ josh pe ab aatā nahīñ

kab talak sabr se girdāb-e-adab meñ rahā jaa.e

koī tadbīr ki ye dasht bhī ho bāġh-e-jināñ

kuchh to is ḳhaak ke bhī ḳhair talab meñ rahā jaa.e

koī ġhauġhā hī uThā chāhiye vīrāna-e-shab

habs ye TuuTe kuchh is fikr-e-naqab meñ rahā jaa.e

ik zarā apne kueñ se kabhī bāhar ko ji.eñ

ik zarā auroñ ke bhī dard-o-ta.ab meñ rahā jaa.e

sochtā huuñ nayā ābād karūñ qarya-e-ishq

aur phir shaan se is shahar-e-ajab meñ rahā jaa.e

qarz miTTī kā kabhī yuuñ adā kar jaa.eñ 'shamīm'

giit ban kar ke har ik ġhuncha-e-lab meñ rahā jaa.e

kya zaruri hai ki bas shor-o-shaghab mein raha jae

bhiD ke sath chalen aur aqab mein raha jae

mujh mein dariya mera kyon josh pe ab aata nahin

kab talak sabr se girdab-e-adab mein raha jae

koi tadbir ki ye dasht bhi ho bagh-e-jinan

kuchh to is KHak ke bhi KHair talab mein raha jae

koi ghaugha hi uTha chahiye virana-e-shab

habs ye TuTe kuchh is fikr-e-naqab mein raha jae

ek zara apne kuen se kabhi bahar ko jien

ek zara auron ke bhi dard-o-tab mein raha jae

sochta hun naya aabaad karun qarya-e-ishq

aur phir shan se is shahar-e-ajab mein raha jae

qarz miTTi ka kabhi yun ada kar jaen 'shamim'

git ban kar ke har ek ghuncha-e-lab mein raha jae