kyon azal se ku-e-mehr-o-mah mein baiThe the hum

kyoñ azal se kū-e-mehr-o-māh meñ baiThe the ham

tujh se milnā thā so terī raah meñ baiThe the ham

pur-tashaddud the manāzir sāmne scrēn par

band āñkhoñ se tamāshā-gāh meñ baiThe the ham

kaun ham ko jāntā thā us jagah phir bhī magar

sab se pīchhe chhup ke bazm-e-shāh meñ baiThe the ham

chāñdnī kā taḳht thā aur raushnī kā taaj thā

raat ke shāhī jamāl-o-jāh meñ baiThe the ham

chaudhvīñ kī raat meñ dariyā kināre der tak

kis ko hai mālūm kis kī chaah meñ baiThe the ham

āsmāñ se aag kī barsāt se chhupte hue

ek din jā kar zamīñ kī thaah meñ baiThe the ham

jañg ke maidān se phir jañg ke maidān tak

zindagī terī hī ik jañgāh meñ baiThe the ham

kyon azal se ku-e-mehr-o-mah mein baiThe the hum

tujh se milna tha so teri rah mein baiThe the hum

pur-tashaddud the manazir samne screen par

band aankhon se tamasha-gah mein baiThe the hum

kaun hum ko jaanta tha us jagah phir bhi magar

sab se pichhe chhup ke bazm-e-shah mein baiThe the hum

chandni ka taKHt tha aur raushni ka taj tha

raat ke shahi jamal-o-jah mein baiThe the hum

chaudhwin ki raat mein dariya kinare der tak

kis ko hai malum kis ki chah mein baiThe the hum

aasman se aag ki barsat se chhupte hue

ek din ja kar zamin ki thah mein baiThe the hum

jang ke maidan se phir jang ke maidan tak

zindagi teri hi ek jangah mein baiThe the hum