kyon kah rahe ho naza mein humse KHafa na ho

kyoñ kah rahe ho naza.a meñ ham se ḳhafā na ho

us ko fareb do jo tumheñ jāntā na ho

ye chāhte haiñ ham ki koī dūsrā na ho

ḳhalvat ho ham hoñ tum ho tumhārī hayā na ho

ai dil ḳhudā ke vāste ham se ḳhafā na ho

husn-āshnā to thā hī sitam-āshnā na ho

vo ho jo terī shaan ke shāyāñ ho ai karīm

maiñ kyā kahūñ zabāñ se ki ab kyā ho kyā na ho

ye aur baat hai ki nayā āsmān hai

jo ho chuke bahut haiñ sitam ab nayā na ho

guzre maze se hashr kā din intizār meñ

maiñ bhī ye chāhtā huuñ ki va.ada vafā na ho

maiñ saḳht-jān duur ajal teġh-e-nāznīñ

ye kaam aap se kahīñ tanhā huā na ho

itnā hī to kahā thā ki jaage ho raat ke

ye rūThne kī baat nahīñ hai ḳhafā na ho

nāvak-fagan Thahar ki zarā dil sañbhāl luuñ

Dartā huuñ maiñ ki phir kahīñ nāvak ḳhatā na ho

ab ā.inoñ kī ḳhair nahīñ hai diloñ kī tarah

vo chāhte haiñ ham sā koī dūsrā na ho

apnī zabāñ se ham use be-dard kyoñ kaheñ

ye aur baat hai ki vo dard-āshnā na ho

lutf-e-kalām ye ki hasīñ sun ke hoñ fidā

'safdar' vo sher kyā hai ki jis meñ maza na ho

kyon kah rahe ho naza mein hum se KHafa na ho

us ko fareb do jo tumhein jaanta na ho

ye chahte hain hum ki koi dusra na ho

KHalwat ho hum hon tum ho tumhaari haya na ho

ai dil KHuda ke waste hum se KHafa na ho

husn-ashna to tha hi sitam-ashna na ho

wo ho jo teri shan ke shayan ho ai karim

main kya kahun zaban se ki ab kya ho kya na ho

ye aur baat hai ki naya aasman hai

jo ho chuke bahut hain sitam ab naya na ho

guzre maze se hashr ka din intizar mein

main bhi ye chahta hun ki wada wafa na ho

main saKHt-jaan dur ajal tegh-e-naznin

ye kaam aap se kahin tanha hua na ho

itna hi to kaha tha ki jage ho raat ke

ye ruThne ki baat nahin hai KHafa na ho

nawak-fagan Thahar ki zara dil sanbhaal lun

Darta hun main ki phir kahin nawak KHata na ho

ab aainon ki KHair nahin hai dilon ki tarah

wo chahte hain hum sa koi dusra na ho

apni zaban se hum use be-dard kyon kahen

ye aur baat hai ki wo dard-ashna na ho

lutf-e-kalam ye ki hasin sun ke hon fida

'safdar' wo sher kya hai ki jis mein maza na ho