kyon karte ho duniya ki har ek baat se tauba

kyoñ karte ho duniyā kī har ik baat se tauba

manzūr to hai merī mulāqāt se tauba

zāhid ne chhupāyā hai use gosha-e-dil meñ

bhāgī thī kisī rind-e-ḳharābāt se tauba

ye fasl agar hogī to har roz piyeñge

ham mai se kareñ tauba ki barsāt se tauba

duniyā kī koī baat hī achchhī nahīñ zāhid

is baat se tauba kabhī us baat se tauba

masjid nahīñ darbār hai ye pīr-e-muġhāñ kā

darvāze ke bāhar rahe auqāt se tauba

ye 'dāġh'-e-qadah-ḳhvār ke kyā jī meñ hai aa.ī

sunte haiñ kiye baiThe haiñ vo raat se tauba

kyon karte ho duniya ki har ek baat se tauba

manzur to hai meri mulaqat se tauba

zahid ne chhupaya hai use gosha-e-dil mein

bhagi thi kisi rind-e-KHarabaat se tauba

ye fasl agar hogi to har roz piyenge

hum mai se karen tauba ki barsat se tauba

duniya ki koi baat hi achchhi nahin zahid

is baat se tauba kabhi us baat se tauba

masjid nahin darbar hai ye pir-e-mughan ka

darwaze ke bahar rahe auqat se tauba

ye 'dagh'-e-qadah-KHwar ke kya ji mein hai aai

sunte hain kiye baiThe hain wo raat se tauba