kyon tum se ilaj-e-dil-e-shaida nahin hota

kyoñ tum se ilāj-e-dil-e-shaidā nahīñ hotā

kyā dard-e-mohabbat kā mudāvā nahīñ hotā

tūfān-e-balā-ḳhez hai har ashk-e-mohabbat

kyūñkar kahīñ qatra kabhī dariyā nahīñ hotā

miltā hī nahīñ sāġhar-e-mai bāda-kashoñ ko

jab tak tirī āñkhoñ kā ishārā nahīñ hotā

chhan-chhan ke umaDtī chalī aatī hai tajallī

koshish bhī kareñ aap to pardā nahīñ hotā

bekār hai arbāb-e-zamāna kī shikāyat

koī bhī zamāne meñ kisī kā nahīñ hotā

jab tak koī muñh moḌ na le dair-o-haram se

asrār-e-haqīqat kā shanāsā nahīñ hotā

tere sitam-o-jaur se haiñ band zabāneñ

ya.anī tirī bedād kā charchā nahīñ hotā

'shaidā' ye duā hai ki burā vaqt na aa.e

apnā bhī bure vaqt meñ apnā nahīñ hotā

kyon tum se ilaj-e-dil-e-shaida nahin hota

kya dard-e-mohabbat ka mudawa nahin hota

tufan-e-bala-KHez hai har ashk-e-mohabbat

kyunkar kahin qatra kabhi dariya nahin hota

milta hi nahin saghar-e-mai baada-kashon ko

jab tak teri aankhon ka ishaara nahin hota

chhan-chhan ke umaDti chali aati hai tajalli

koshish bhi karen aap to parda nahin hota

bekar hai arbab-e-zamana ki shikayat

koi bhi zamane mein kisi ka nahin hota

jab tak koi munh moD na le dair-o-haram se

asrar-e-haqiqat ka shanasa nahin hota

tere sitam-o-jaur se hain band zabanen

yani teri bedad ka charcha nahin hota

'shaida' ye dua hai ki bura waqt na aae

apna bhi bure waqt mein apna nahin hota