kyun aashna-e-gham dil-e-wahshat-asar nahin

kyuuñ āshnā-e-ġham dil-e-vahshat-asar nahīñ

mānūs-e-iltifāt vo zālim agar nahīñ

maiñ huuñ talāsh-e-rāh-e-mohabbat hai dasht hai

saaya nahīñ nishān nahīñ ham-safar nahīñ

phir rāh-rau se letā huuñ manzil kā kuchh surāġh

sab rāhbar haiñ mere koī rāhbar nahīñ

phir andalīb-e-zār ne tinke uThā liye

shāyad chaman ujaḌne kī is ko ḳhabar nahīñ

maiñ aur jām-o-naġhma-o-mutrib se vāsta

ḳhush huuñ ki merā bazm-e-tarab meñ guzar nahīñ

kyuuñ jal na jaa.e tāb-e-ruḳh-e-yār dekh kar

dil hai ye koī chashm-e-haqīqat-nigar nahīñ

aurāq-e-do-jahāñ pe jo tahrīr ho sake

itnā mirā fasāna-e-ġham muḳhtasar nahīñ

zabt-e-junūñ ne Dhaa.ī haiñ dil kī imārateñ

ab is dayār meñ koī dīvār-o-dar nahīñ

dil ko supurd karte haiñ apnā payām-e-jāñ

ye mo'tabar nahīñ to koī mo'tabar nahīñ

paivast hoñ na jis meñ zamāne ke dil 'jigar'

kuchh aur hai vo aap kā tīr-e-nazar nahīñ

kaisī duā kahāñ kā asar kis kā mudda.ā

kuchh aag ke sivā mire dil meñ 'jigar' nahīñ

kyun aashna-e-gham dil-e-wahshat-asar nahin

manus-e-iltifat wo zalim agar nahin

main hun talash-e-rah-e-mohabbat hai dasht hai

saya nahin nishan nahin ham-safar nahin

phir rah-rau se leta hun manzil ka kuchh suragh

sab rahbar hain mere koi rahbar nahin

phir andalib-e-zar ne tinke uTha liye

shayad chaman ujaDne ki is ko KHabar nahin

main aur jam-o-naghma-o-mutrib se wasta

KHush hun ki mera bazm-e-tarab mein guzar nahin

kyun jal na jae tab-e-ruKH-e-yar dekh kar

dil hai ye koi chashm-e-haqiqat-nigar nahin

auraq-e-do-jahan pe jo tahrir ho sake

itna mera fasana-e-gham muKHtasar nahin

zabt-e-junun ne Dhai hain dil ki imaraten

ab is dayar mein koi diwar-o-dar nahin

dil ko supurd karte hain apna payam-e-jaan

ye mo'tabar nahin to koi mo'tabar nahin

paiwast hon na jis mein zamane ke dil 'jigar'

kuchh aur hai wo aap ka tir-e-nazar nahin

kaisi dua kahan ka asar kis ka muddaa

kuchh aag ke siwa mere dil mein 'jigar' nahin