kyun chup hain wo be-baat samajh mein nahin aata

kyuuñ chup haiñ vo be-bāt samajh meñ nahīñ aatā

ye rañg-e-mulāqāt samajh meñ nahīñ aatā

kyā dād-e-suḳhan ham tumheñ deñ hazrat-e-nāseh

hai sau kī ye ik baat samajh meñ nahīñ aatā

shaiḳh aur bhalā.ī se kare tazkira terā

ai pīr-e-ḳharābāt samajh meñ nahīñ aatā

saaya bhī shab-e-hijr kī zulmat meñ chhupā hai

ab kis se kareñ baat samajh meñ nahīñ aatā

mushtāq-e-sitam aap haiñ mushtāq-e-ajal ham

phir kyuuñ ye rukā haat samajh meñ nahīñ aatā

rokā unheñ jaane se sar-e-shām to bole

kyuuñ karte ho tum raat samajh meñ nahīñ aatā

dil ek hai aur is ke talabgār hazāroñ

deñ kis ko ye sauġhāt samajh meñ nahīñ aatā

kyūñ-kar kahūñ 'ahsan' ki adū dost hai merā

ho nek vo bad-zāt samajh meñ nahīñ aatā

kyun chup hain wo be-baat samajh mein nahin aata

ye rang-e-mulaqat samajh mein nahin aata

kya dad-e-suKHan hum tumhein den hazrat-e-naseh

hai sau ki ye ek baat samajh mein nahin aata

shaiKH aur bhalai se kare tazkira tera

ai pir-e-KHarabaat samajh mein nahin aata

saya bhi shab-e-hijr ki zulmat mein chhupa hai

ab kis se karen baat samajh mein nahin aata

mushtaq-e-sitam aap hain mushtaq-e-ajal hum

phir kyun ye ruka hat samajh mein nahin aata

roka unhen jaane se sar-e-sham to bole

kyun karte ho tum raat samajh mein nahin aata

dil ek hai aur is ke talabgar hazaron

den kis ko ye saughat samajh mein nahin aata

kyun-kar kahun 'ahsan' ki adu dost hai mera

ho nek wo bad-zat samajh mein nahin aata