kyun dekhiye na husn-e-KHuda-dad ki taraf

kyuuñ dekhiye na husn-e-ḳhudā-dād kī taraf

lāzim nazar hai gulshan-e-ījād kī taraf

paa.e jo tere gosha-e-dastār kī havā

qumrī uḌī na turra-e-shamshād kī taraf

be-asl ai falak nazar aatā hai tū mujhe

kartā huuñ ġhaur jab tirī buniyād kī taraf

gulshan meñ kaun bulbul-e-nālāñ ko de panāh

gulchīñ o bāġhbāñ bhī haiñ sayyād kī taraf

mazlūm huuñ magar nahīñ miltā koī gavāh

haiñ ahl-e-hashr is sitam-ījād kī taraf

nādāñ kahīñ panāh nahīñ maut se tujhe

kyā dekhtā hai qila-e-faulād kī taraf

ham-jins ko zarūr hai ham-jins kā ḳhayāl

raġhbat na ho bashar ko parī-zād kī taraf

mazmūñ kamar kā haath na aayā jo dahr meñ

jaanā paḌā mujhe adam-ābād kī taraf

taklīf jū-e-shīr kī de kar jo thī ḳhajil

shīrīñ na dekh saktī thī farhād kī taraf

dīvāngī kā zor tamāshā hai ai parī

fassād kī nigāh hai haddād kī taraf

gardan jhukā.e shauq-e-shahādat meñ huuñ ravāñ

dil le chalā hai kūcha-e-jallād kī taraf

umīd-vār chashm-e-ināyat kā hai ġharīb

dekho to ik nazar dil-e-nāshād kī taraf

nāseh agar sitam na saheñ ham to kyā kareñ

dil dauḌtā hai yaar kī be-dād kī taraf

bulbul samajh rahī hai ki gulhā-e-ḳhanda-rū

rakhte haiñ kaan nāla-o-fariyād kī taraf

fazl-e-ḳhudā se apnī tabī.at hai be-niyāz

rū-e-talab kabhī na huā daad kī taraf

vaa.iz se sun ke qāmat-e-tauba kī ḳhūbiyāñ

dauḌā ḳhayāl ik qad-e-āzād kī taraf

bhūle hue haiñ saare zamāne kī nemateñ

mailān-e-dil jinheñ hai terī yaad kī taraf

yā shāh-e-jinn-o-ins 'asar' par bhī ik nazar

rakhtā hai aañkh aap kī imdād kī taraf

kyun dekhiye na husn-e-KHuda-dad ki taraf

lazim nazar hai gulshan-e-ijad ki taraf

pae jo tere gosha-e-dastar ki hawa

qumri uDi na turra-e-shamshad ki taraf

be-asl ai falak nazar aata hai tu mujhe

karta hun ghaur jab teri buniyaad ki taraf

gulshan mein kaun bulbul-e-nalan ko de panah

gulchin o baghban bhi hain sayyaad ki taraf

mazlum hun magar nahin milta koi gawah

hain ahl-e-hashr is sitam-ijad ki taraf

nadan kahin panah nahin maut se tujhe

kya dekhta hai qila-e-faulad ki taraf

ham-jins ko zarur hai ham-jins ka KHayal

raghbat na ho bashar ko pari-zad ki taraf

mazmun kamar ka hath na aaya jo dahr mein

jaana paDa mujhe adam-abaad ki taraf

taklif ju-e-shir ki de kar jo thi KHajil

shirin na dekh sakti thi farhad ki taraf

diwangi ka zor tamasha hai ai pari

fassad ki nigah hai haddad ki taraf

gardan jhukae shauq-e-shahadat mein hun rawan

dil le chala hai kucha-e-jallad ki taraf

umid-war chashm-e-inayat ka hai gharib

dekho to ek nazar dil-e-nashad ki taraf

naseh agar sitam na sahen hum to kya karen

dil dauDta hai yar ki be-dad ki taraf

bulbul samajh rahi hai ki gulha-e-KHanda-ru

rakhte hain kan nala-o-fariyaad ki taraf

fazl-e-KHuda se apni tabiat hai be-niyaz

ru-e-talab kabhi na hua dad ki taraf

waiz se sun ke qamat-e-tauba ki KHubiyan

dauDa KHayal ek qad-e-azad ki taraf

bhule hue hain sare zamane ki nematen

mailan-e-dil jinhen hai teri yaad ki taraf

ya shah-e-jinn-o-ins 'asar' par bhi ek nazar

rakhta hai aankh aap ki imdad ki taraf