kyun fana se Daren baqa kya hai

kyuuñ fanā se Dareñ baqā kyā hai

bujh gayā dil hī jab rahā kyā hai

bhar gayā kyuuñ tasanno.āt se jī

parda āñkhoñ se uTh gayā kyā hai

surma-e-dīda-hā-e-ahl-e-nazar

ban ga.ī hai jo ḳhāk-e-pā kyā hai

kaise duniyā vajūd meñ aa.ī

āfrīnash kā mudda.ā kyā hai

jis meñ arboñ jahāñ samā.e haiñ

vo fazā kyā hai vo ḳhalā kyā hai

chāñd kī samt haiñ davāñ maujeñ

kyā kashish hai ye mājrā kyā hai

phail jaatī hai kis tarah āvāz

aañkh kā sehr hai ziyā kyā hai

jism-e-be-rūh ko ḳhabar hī nahīñ

duḳhma kyā gor kyā chitā kyā hai

kyā jamādāt se bhī kam hai bashar

zar kī puujā se mudda.ā kyā hai

aks hai aks har shabīh yahāñ

guuñj hī guuñj hai sadā kyā hai

kyun fana se Daren baqa kya hai

bujh gaya dil hi jab raha kya hai

bhar gaya kyun tasannoat se ji

parda aankhon se uTh gaya kya hai

surma-e-dida-ha-e-ahl-e-nazar

ban gai hai jo KHak-e-pa kya hai

kaise duniya wajud mein aai

aafrinash ka muddaa kya hai

jis mein arbon jahan samae hain

wo faza kya hai wo KHala kya hai

chand ki samt hain dawan maujen

kya kashish hai ye majra kya hai

phail jati hai kis tarah aawaz

aankh ka sehr hai ziya kya hai

jism-e-be-ruh ko KHabar hi nahin

duKHma kya gor kya chita kya hai

kya jamadat se bhi kam hai bashar

zar ki puja se muddaa kya hai

aks hai aks har shabih yahan

gunj hi gunj hai sada kya hai