kyun na hum ahd-e-rifaqat ko bhulane lag jaen

kyuuñ na ham ahd-e-rifāqat ko bhulāne lag jaa.eñ

shāyad is zaḳhm ko bharne meñ zamāne lag jaa.eñ

nahīñ aisā bhī ki ik umr kī qurbat ke nashe

ek do roz kī ranjish se Thikāne lag jaa.eñ

yahī nāseh jo hameñ tujh se na milne ko kaheñ

tujh ko dekheñ to tujhe dekhne aane lag jaa.eñ

ham ki haiñ lazzat-e-āzār ke maare hue log

chāragar aa.eñ to zaḳhmoñ ko chhupāne lag jaa.eñ

rabt ke saiñkaḌoñ hiile haiñ mohabbat na sahī

ham tire saath kisī aur bahāne lag jaa.eñ

sāqiyā masjid o maktab to nahīñ mai-ḳhāna

dekhnā phir bhī ġhalat log na aane lag jaa.eñ

qurb achchhā hai magar itnī bhī shiddat se na mil

ye na ho tujh ko mire rog purāne lag jaa.eñ

ab 'farāz' aao chaleñ apne qabīle kī taraf

shā.irī tark kareñ bojh uThāne lag jaa.eñ

kyun na hum ahd-e-rifaqat ko bhulane lag jaen

shayad is zaKHm ko bharne mein zamane lag jaen

nahin aisa bhi ki ek umr ki qurbat ke nashe

ek do roz ki ranjish se Thikane lag jaen

yahi naseh jo hamein tujh se na milne ko kahen

tujh ko dekhen to tujhe dekhne aane lag jaen

hum ki hain lazzat-e-azar ke mare hue log

chaaragar aaen to zaKHmon ko chhupane lag jaen

rabt ke sainkaDon hile hain mohabbat na sahi

hum tere sath kisi aur bahane lag jaen

saqiya masjid o maktab to nahin mai-KHana

dekhna phir bhi ghalat log na aane lag jaen

qurb achchha hai magar itni bhi shiddat se na mil

ye na ho tujh ko mere rog purane lag jaen

ab 'faraaz' aao chalen apne qabile ki taraf

shairi tark karen bojh uThane lag jaen