kyun na hun hairan teri har baat ka

kyuuñ na huuñ hairāñ tirī har baat kā

husn muraqqa.a hai tilismāt kā

ro.uuñ to ḳhush ho ke piye hai vo mai

samjhe hai mausam ise barsāt kā

uThtī javānī jo hai to din-ba-din

aur hī aalam hai kuchh is gaat kā

ghar meñ bulāyā hai to kuchh muñh se do

sīkho ye Dhab ham se mudārāt kā

shaiḳh javāñ hogā tū pī dekh ise

shīshe meñ paanī hai karāmāt kā

ham na mileñ tum se to nikle hai jaañ

aur tumheñ aalam hai musāvāt kā

us ne kī ab kam-suḳhanī iḳhtiyār

jis ko maza thā mirī har baat kā

aañkh bhī miltī hai to nā-āshnā

ab vo kahāñ lutf ishārāt kā

rone kī jā hai sun ise ham-nashīñ

tū to hai mahram mire auqāt kā

hukm huā raat ko aao na yaañ

din ko rakho taur mulāqāt kā

dil ke aTakte hī huā hai sitam

farq mulāqāt meñ din raat kā

baat na.ī sūjhe hai 'jur.at' tujhe

maiñ to huuñ āshiq tirī is baat kā

kyun na hun hairan teri har baat ka

husn muraqqa hai tilismat ka

roun to KHush ho ke piye hai wo mai

samjhe hai mausam ise barsat ka

uThti jawani jo hai to din-ba-din

aur hi aalam hai kuchh is gat ka

ghar mein bulaya hai to kuchh munh se do

sikho ye Dhab hum se mudaraat ka

shaiKH jawan hoga tu pi dekh ise

shishe mein pani hai karamat ka

hum na milen tum se to nikle hai jaan

aur tumhein aalam hai musawat ka

us ne ki ab kam-suKHani iKHtiyar

jis ko maza tha meri har baat ka

aankh bhi milti hai to na-ashna

ab wo kahan lutf ishaaraat ka

rone ki ja hai sun ise ham-nashin

tu to hai mahram mere auqat ka

hukm hua raat ko aao na yan

din ko rakho taur mulaqat ka

dil ke aTakte hi hua hai sitam

farq mulaqat mein din raat ka

baat nai sujhe hai 'jurat' tujhe

main to hun aashiq teri is baat ka