kyun qatl ke arman mein aazar uThaen

kyuuñ qatl ke armān meñ āzār uThā.eñ

gardan mirī hāzir hai vo talvār uThā.eñ

roke se mirī tab-e-ravāñ ruk na sakegī

raste meñ mire laakh vo dīvār uThā.eñ

jo dil meñ tumhāre hai batā kyuuñ nahīñ dete

sadma jo uThānā hai to yakbār uThā.eñ

kyuuñ log haiñ ḳhāmosh zabūñ-hāl pe apne

āvāz sar-e-kūcha-o-bāzār uThā.eñ

ḳhud hī jo pas-e-parda-e-asrār chhupe haiñ

vo kaise bhalā parda-e-asrār uThā.eñ

nīlām jo karte haiñ yahāñ jins-e-vafā ko

mumkin hī nahīñ nāz-e-ḳharīdār uThā.eñ

ye jurm-e-mohabbat nahīñ vaa.iz kā muqaddar

ye bār-e-gunāh ham se gunahgār uThā.eñ

phirte haiñ jo āzād unheñ kaise ḳhabar ho

zindāñ meñ jo taklīf-e-giraftār uThā.eñ

'shāhid' yahī likkhā hai muqaddar meñ hamāre

sadmāt zamāne meñ lagātār uThā.eñ

kyun qatl ke arman mein aazar uThaen

gardan meri hazir hai wo talwar uThaen

roke se meri tab-e-rawan ruk na sakegi

raste mein mere lakh wo diwar uThaen

jo dil mein tumhaare hai bata kyun nahin dete

sadma jo uThana hai to yakbar uThaen

kyun log hain KHamosh zabun-haal pe apne

aawaz sar-e-kucha-o-bazar uThaen

KHud hi jo pas-e-parda-e-asrar chhupe hain

wo kaise bhala parda-e-asrar uThaen

nilam jo karte hain yahan jins-e-wafa ko

mumkin hi nahin naz-e-KHaridar uThaen

ye jurm-e-mohabbat nahin waiz ka muqaddar

ye bar-e-gunah hum se gunahgar uThaen

phirte hain jo aazad unhen kaise KHabar ho

zindan mein jo taklif-e-giraftar uThaen

'shahid' yahi likkha hai muqaddar mein hamare

sadmat zamane mein lagatar uThaen