kyun shauq baDh gaya ramazan mein singar ka

kyuuñ shauq baḌh gayā ramazāñ meñ siñgār kā

roza na TuuT jaa.e kisī roza-dār kā

un kā vo shoḳhiyoñ se phaḌaknā palañg par

vo chhātiyoñ pe loTnā phūloñ ke haar kā

huur aa.e ḳhuld se to biThā.ūñ kahāñ use

ārāsta ho ek to konā mazār kā

shīshoñ ne tarz uḌaa.ī rukū o qayām kī

kyā in meñ hai lahū kisī parhez-gār kā

kyuuñ ġhash hue kalīm tajallī-e-tūr par

vo ik charāġh thā mire dil ke mazār kā

ba.ad-e-fanā bhī saaf nahīñ dil raqīb se

gumbad khaḌā huā hai lahad par ġhubār kā

kasrat kā rang shāhid-e-vahdat kā hai banāv

vo ek hī se naam hai hazda hazār kā

nāqūs bin ke pūchhne jā.ūñ agar mizāj

but bhī kaheñge shukr hai parvardigār kā

dūlhā kī ye barāt hai rasmeñ adā karo

dar par janāza aayā hai ik jāñ-nisār kā

kyā kyā taḌap taḌap ke sarāfīl gir paḌe

dam aa gayā jo suur meñ mujh be-qarār kā

surma ke saath phail ke kyā vo bhī miT gayā

kyuuñ naam tak nahīñ tirī āñkhoñ meñ pyaar kā

kyā raat se kisī kī nazar lag ga.ī ise

achchhā nahīñ mizāj dil-e-be-qarār kā

āñkheñ mirī faqīr huiiñ shauq-e-dīd meñ

tasma kamar meñ hai nigah-e-intizār kā

lūTūñ maze jo bāzī-e-shatranj jiit luuñ

is khel meñ to vā'da hai bos-e-kanār kā

allāh mirā ġhafūr mohammad mire shafī.a

'mā.il' ko ḳhauf kuchh nahīñ roz-e-shumār kā

kyun shauq baDh gaya ramazan mein singar ka

roza na TuT jae kisi roza-dar ka

un ka wo shoKHiyon se phaDakna palang par

wo chhatiyon pe loTna phulon ke haar ka

hur aae KHuld se to biThaun kahan use

aarasta ho ek to kona mazar ka

shishon ne tarz uDai ruku o qayam ki

kya in mein hai lahu kisi parhez-gar ka

kyun ghash hue kalim tajalli-e-tur par

wo ek charagh tha mere dil ke mazar ka

baad-e-fana bhi saf nahin dil raqib se

gumbad khaDa hua hai lahad par ghubar ka

kasrat ka rang shahid-e-wahdat ka hai banaw

wo ek hi se nam hai hazda hazar ka

naqus bin ke puchhne jaun agar mizaj

but bhi kahenge shukr hai parwardigar ka

dulha ki ye baraat hai rasmen ada karo

dar par janaza aaya hai ek jaan-nisar ka

kya kya taDap taDap ke sarafil gir paDe

dam aa gaya jo sur mein mujh be-qarar ka

surma ke sath phail ke kya wo bhi miT gaya

kyun nam tak nahin teri aankhon mein pyar ka

kya raat se kisi ki nazar lag gai ise

achchha nahin mizaj dil-e-be-qarar ka

aankhen meri faqir huin shauq-e-did mein

tasma kamar mein hai nigah-e-intizar ka

luTun maze jo bazi-e-shatranj jit lun

is khel mein to wa'da hai bos-e-kanar ka

allah mera ghafur mohammad mere shafia

'mail' ko KHauf kuchh nahin roz-e-shumar ka