kyunkar na KHush ho sar mera laTakka ke dar mein

kyūñkar na ḳhush ho sar mirā laTakkā ke daar meñ

kyā phal lagā hai naḳhl-e-tamannā-e-yār meñ

chāhā bahut valī na muā hijr-e-yār meñ

mahbūb kyā ajal bhī nahīñ iḳhtiyār meñ

mūbāf surḳh kyuuñ na ho gesū-e-yār meñ

shab-ḳhūn yā'nī laate haiñ shub.hā-e-tār meñ

mūbāf hai kināre kā zulf-e-nigār meñ

yā barf kaundtī hai ye abr-e-bahār meñ

rāhat ke saath ranj bhī hai rozgār meñ

hañsne pe gul ke rotī hai shabnam bahār meñ

pinhāñ huā hai ḳhāl-e-ḳhat-e-mushk-bār meñ

miltā nahīñ hai DhūñDhe se naafā tatār meñ

mar jā.ūñgā ḳhayāl-e-ruḳh-o-zulf yaar meñ

aa jā.egī ajal isī lail-o-nahār meñ

lipTī hai choTī yaar kī phūloñ ke haar meñ

sumbul ne gul khilā.e haiñ fasl-e-bahār meñ

aa.uuñ na aap meñ jo vo aa.e kanār meñ

rakkhūñ maiñ apnī tarah use intizār meñ

sabza tak apnī qabar kā ḳhvābīda ho gayā

par ham ko niiñd aa.ī na ik dam mazār meñ

o barq-e-tūr tā-ba-kujā lan-tarāniyāñ

pathrā ga.iiñ haiñ āñkheñ mire intizār meñ

jaa.eñ kab āshnā tirī dariyā kī sair ko

ashk-e-ravāñ se rakhtī haiñ dariyā kanār meñ

ye kis ne aa ke qabar pe bechain kar diyā

kyā so rahī thī chain se kunj-e-mazār meñ

aayā hai ḳhvāb bhī shab-e-vā'da agar hameñ

āñkheñ khulī rahī haiñ tire intizār meñ

ḳhāk-e-chaman se kyā hai mirā kālbud banā

dāġhoñ se gul jo khilte haiñ fasl-e-bahār meñ

baa'd az fanā bhī husn-parastī se kaam hai

aa.ina saañ safā.ī hai sañg-e-mazār meñ

aañsū bahā.ūñ āñkhoñ se us ko lagā ke maiñ

motī piroūñ yaar kī phūloñ ke haar meñ

kyuuñ muñh se boltā nahīñ niklā hai ab to ḳhat

darvāza band baaġh kā mat kar bahār meñ

rote haiñ yaad gauhar-e-dandān meñ un din

motī bhare haiñ misl-e-sadaf yaañ kanār meñ

kahiye vo lā'l-e-lab ḳhat-e-mushkīñ meñ dekh kar

paidā huā hai lāl-e-badaḳhshāñ tatār meñ

farhād kī ye āñkheñ haiñ shīrīñ ko DhūñDhte

ab dil ġhazāl phirtī nahīñ kohsār meñ

muuzī hai charḳh is se nahīñ kaj-ravī ba'īd

sach yuuñ hai rāstī nahīñ raftār meñ

tujh bin nahīñ ye jalva-numā shab ko māhtāb

chashm-e-falak safed hue intizār meñ

to sun ke saath dauḌūñ jo maiñ man' bhī karūñ

zālim anān-e-sabr nahīñ iḳhtiyār meñ

phūloñ kā haar ban gayā hai motiyoñ kā haar

aisā ḳhushī se phuul gayā dast-e-yār meñ

nafrat ye in guloñ ko hai marne ke baa'd bhī

hotā nahīñ hai gul mire sham'-e-mazār meñ

gesū ko us kī kuchh nahīñ parvā-e-naqd-e-dil

ye maal vo hai jo hai sab chashm-e-yār meñ

detī hai nā-tavānī agar ruḳhsat-e-chaman

phañstā huuñ dām-e-mauj-e-nasīm-e-bahār meñ

kartā hai koī turk-dilā neza-bāziyāñ

dumbāla surme kā ye nahīñ chashm-e-yār meñ

pīsegā ustuḳhvāñ asar-e-iztirāb-e-dil

'ālam ab āsiyā kā hai sañg-e-mazār meñ

bāġh-e-jahāñ meñ 'aish ke fursat bahut hai kam

labrez jām-e-umr hai gul kā bahār meñ

kis māh-vash se raat ham-āġhosh ham hue

'ālam hilāl kā hai hamāre kanār meñ

masl-e-hinā hai ġhair kī hāthoñ mire bahār

sarsabz agarche hoñ chaman-e-rozgār meñ

aatā hai jab vo tan meñ mire jaan aatī hai

jaane meñ misl-e-umr nahīñ iḳhtiyār meñ

allāh re safā.ī-e-ruḳh-e-yār dekhnā

hairān hai aa.ina kaf-e-ā.ina-dār meñ

apne gale ke haar ke gar vo chaḌhā.e phuul

phūlā na phir samā.ūñ maiñ kunj-e-mazār meñ

gar peshvā-e-ḳhalq hai zāhid to kyā huā

tasbīh kā imaam nahīñ hai shumār meñ

mazmūn tirī kamar kā hai kyā aaj banda gayā

'anqā phañsā hai un kī dām-e-shikār meñ

jhaḌtī haiñ muñh se phuul jo kartā hai baat tū

tujh sā nahīñ hai gul chaman-e-rozgār meñ

qāsid to saaf kah dī mukaddar hai mujh se kyā

likkhā jo naama yaar ne ḳhatt-e-ġhubār meñ

talvār le jo haath meñ ban jaa.e shāḳh-e-gul

sausan kā phuul hue sipar dast-e-yār meñ

ye kis ne aa ke qabr ko rauñdā hai paaoñ se

aatī hai bū-e-gul mirī ḳhāk-e-mazār meñ

baa'd az fanā bhī ḳhvāhish-e-dīdār-e-yār hai

rauzan koī zarūr hai mere mazār meñ

jab raat hotī hai to sitāre nikalte haiñ

afshāñ zarūr chāhiye the zulf-e-yār meñ

kis ko ye hosh hai jo kare chaak jeb ko

bāhar hoñ apne jaame se fasl-e-bahār meñ

farmā.ish apnī dekhne vāloñ pe kartī haiñ

āñkhoñ ke Dore hoñ mire phūloñ ke haar meñ

paañv se apne aa.egī sahrā meñ bhī bahār

chhāle hamāre phuul piro.eñge ḳhaar meñ

vājib hai āb-e-teġh se kar lījiye vuzū

sajda jo kījiye ḳham-e-abrū-e-yār meñ

dariyā meñ us kī tīr-e-mizha kā paḌe jo 'aks

surāḳh ho har ik guhar-e-āb-dār meñ

aayā kabhī na yaar na aayā maiñ aap meñ

apne aur us ke shikve kiye intizār meñ

nāsūr paḌ ga.ī tire dāñtoñ ke rashk se

rauzan nahīñ haiñ ye guhar-e-ābdār meñ

khā khā ke gul muā huuñ jo maiñ mere ḳhaak ke

tā.ūs bante haiñ chaman-e-rozgār meñ

aate hī fasl-e-gul mujhe josh-e-junūñ huā

zanjīr-e-dar se baaġh ke bāñdho bahār meñ

karte hī saaf ā.īne ko ḳhaak dekh le

jauhar na pūchh jo haiñ har ik ḳhāksār meñ

rakhte nahīñ ġhurūr se vo paañv 'arsh par

chalte haiñ sar ke bal jo rah-e-kū-e-yār meñ

batlā.ūñ kyā vo kaisī hai ārām kī jagah

so jaa.eñ paañv jā.ūñ agar kū-e-yār meñ

apne sivā nahīñ hai koī apnā āshnā

dariyā kī tarah aap haiñ apne kanār meñ

'goyā' kabhī hai yaas kabhī intizār-e-yār

kyā kyā haiñ ranj zindagī-e-musta'ār meñ

kyunkar na KHush ho sar mera laTakka ke dar mein

kya phal laga hai naKHl-e-tamanna-e-yar mein

chaha bahut wali na mua hijr-e-yar mein

mahbub kya ajal bhi nahin iKHtiyar mein

mubaf surKH kyun na ho gesu-e-yar mein

shab-KHun ya'ni late hain shubha-e-tar mein

mubaf hai kinare ka zulf-e-nigar mein

ya barf kaundti hai ye abr-e-bahaar mein

rahat ke sath ranj bhi hai rozgar mein

hansne pe gul ke roti hai shabnam bahaar mein

pinhan hua hai KHal-e-KHat-e-mushk-bar mein

milta nahin hai DhunDhe se nafa tatar mein

mar jaunga KHayal-e-ruKH-o-zulf yar mein

aa jaegi ajal isi lail-o-nahaar mein

lipTi hai choTi yar ki phulon ke haar mein

sumbul ne gul khilae hain fasl-e-bahaar mein

aaun na aap mein jo wo aae kanar mein

rakkhun main apni tarah use intizar mein

sabza tak apni qabar ka KHwabida ho gaya

par hum ko nind aai na ek dam mazar mein

o barq-e-tur ta-ba-kuja lan-taraniyan

pathra gain hain aankhen mere intizar mein

jaen kab aashna teri dariya ki sair ko

ashk-e-rawan se rakhti hain dariya kanar mein

ye kis ne aa ke qabar pe bechain kar diya

kya so rahi thi chain se kunj-e-mazar mein

aaya hai KHwab bhi shab-e-wa'da agar hamein

aankhen khuli rahi hain tere intizar mein

KHak-e-chaman se kya hai mera kalbud bana

daghon se gul jo khilte hain fasl-e-bahaar mein

ba'd az fana bhi husn-parasti se kaam hai

aaina san safai hai sang-e-mazar mein

aansu bahaun aankhon se us ko laga ke main

moti piroun yar ki phulon ke haar mein

kyun munh se bolta nahin nikla hai ab to KHat

darwaza band bagh ka mat kar bahaar mein

rote hain yaad gauhar-e-dandan mein un din

moti bhare hain misl-e-sadaf yan kanar mein

kahiye wo la'l-e-lab KHat-e-mushkin mein dekh kar

paida hua hai lal-e-badaKHshan tatar mein

farhad ki ye aankhen hain shirin ko DhunDhte

ab dil ghazal phirti nahin kohsar mein

muzi hai charKH is se nahin kaj-rawi ba'id

sach yun hai rasti nahin raftar mein

tujh bin nahin ye jalwa-numa shab ko mahtab

chashm-e-falak safed hue intizar mein

to sun ke sath dauDun jo main man' bhi karun

zalim anan-e-sabr nahin iKHtiyar mein

phulon ka haar ban gaya hai motiyon ka haar

aisa KHushi se phul gaya dast-e-yar mein

nafrat ye in gulon ko hai marne ke ba'd bhi

hota nahin hai gul mere sham'-e-mazar mein

gesu ko us ki kuchh nahin parwa-e-naqd-e-dil

ye mal wo hai jo hai sab chashm-e-yar mein

deti hai na-tawani agar ruKHsat-e-chaman

phansta hun dam-e-mauj-e-nasim-e-bahaar mein

karta hai koi turk-dila neza-baziyan

dumbaala surme ka ye nahin chashm-e-yar mein

pisega ustuKHwan asar-e-iztirab-e-dil

'alam ab aasiya ka hai sang-e-mazar mein

bagh-e-jahan mein 'aish ke fursat bahut hai kam

labrez jam-e-umr hai gul ka bahaar mein

kis mah-wash se raat ham-aghosh hum hue

'alam hilal ka hai hamare kanar mein

masl-e-hina hai ghair ki hathon mere bahaar

sarsabz agarche hon chaman-e-rozgar mein

aata hai jab wo tan mein mere jaan aati hai

jaane mein misl-e-umr nahin iKHtiyar mein

allah re safai-e-ruKH-e-yar dekhna

hairan hai aaina kaf-e-aina-dar mein

apne gale ke haar ke gar wo chaDhae phul

phula na phir samaun main kunj-e-mazar mein

gar peshwa-e-KHalq hai zahid to kya hua

tasbih ka imam nahin hai shumar mein

mazmun teri kamar ka hai kya aaj banda gaya

'anqa phansa hai un ki dam-e-shikar mein

jhaDti hain munh se phul jo karta hai baat tu

tujh sa nahin hai gul chaman-e-rozgar mein

qasid to saf kah di mukaddar hai mujh se kya

likkha jo nama yar ne KHatt-e-ghubar mein

talwar le jo hath mein ban jae shaKH-e-gul

sausan ka phul hue sipar dast-e-yar mein

ye kis ne aa ke qabr ko raunda hai paon se

aati hai bu-e-gul meri KHak-e-mazar mein

ba'd az fana bhi KHwahish-e-didar-e-yar hai

rauzan koi zarur hai mere mazar mein

jab raat hoti hai to sitare nikalte hain

afshan zarur chahiye the zulf-e-yar mein

kis ko ye hosh hai jo kare chaak jeb ko

bahar hon apne jame se fasl-e-bahaar mein

farmaish apni dekhne walon pe karti hain

aankhon ke Dore hon mere phulon ke haar mein

panw se apne aaegi sahra mein bhi bahaar

chhaale hamare phul piroenge KHar mein

wajib hai aab-e-tegh se kar lijiye wuzu

sajda jo kijiye KHam-e-abru-e-yar mein

dariya mein us ki tir-e-mizha ka paDe jo 'aks

suraKH ho har ek guhar-e-ab-dar mein

aaya kabhi na yar na aaya main aap mein

apne aur us ke shikwe kiye intizar mein

nasur paD gai tere danton ke rashk se

rauzan nahin hain ye guhar-e-abdar mein

kha kha ke gul mua hun jo main mere KHak ke

taus bante hain chaman-e-rozgar mein

aate hi fasl-e-gul mujhe josh-e-junun hua

zanjir-e-dar se bagh ke bandho bahaar mein

karte hi saf aaine ko KHak dekh le

jauhar na puchh jo hain har ek KHaksar mein

rakhte nahin ghurur se wo panw 'arsh par

chalte hain sar ke bal jo rah-e-ku-e-yar mein

batlaun kya wo kaisi hai aaram ki jagah

so jaen panw jaun agar ku-e-yar mein

apne siwa nahin hai koi apna aashna

dariya ki tarah aap hain apne kanar mein

'goya' kabhi hai yas kabhi intizar-e-yar

kya kya hain ranj zindagi-e-musta'ar mein