lakhon dinon ke bojh tale gham-rasida log

lākhoñ dinoñ ke bojh tale ġham-rasīda log

apnī talāsh meñ haiñ ravāñ sar-burīda log

dhāge ḳhushī ke apne badan se lapeT kar

zaḳhmoñ kī bastiyoñ meñ rahe āb-dīda log

bohrān mere ism ko de kar chale ga.e

jo mere ahd meñ the kabhī nā-shunīda log

pighlā huā hai zehn taqāzoñ kī dhuup se

mahfil meñ hañs rahe haiñ magar shab-gazīda log

ik ahd ke safar meñ anā bhī sharīk thī

lekin use samajh na sake be-aqīda log

vo mere hī ḳhayāl ke raushan nishān haiñ

lafzoñ meñ jo bayān hue ḳhat-kashīda log

mere lahū ko chhīn ke bāzār meñ bike

tājir mire shu.ūr ke 'tāhir' na-dīda log

lakhon dinon ke bojh tale gham-rasida log

apni talash mein hain rawan sar-burida log

dhage KHushi ke apne badan se lapeT kar

zaKHmon ki bastiyon mein rahe aab-dida log

bohran mere ism ko de kar chale gae

jo mere ahd mein the kabhi na-shunida log

pighla hua hai zehn taqazon ki dhup se

mahfil mein hans rahe hain magar shab-gazida log

ek ahd ke safar mein ana bhi sharik thi

lekin use samajh na sake be-aqida log

wo mere hi KHayal ke raushan nishan hain

lafzon mein jo bayan hue KHat-kashida log

mere lahu ko chhin ke bazar mein bike

tajir mere shuur ke 'tahir' na-dida log