lab-e-dariya jo pyase mar gae hain

lab-e-dariyā jo pyāse mar ga.e haiñ

junūñ kā naam raushan kar ga.e haiñ

husainī qāfila jab yaad aayā

kaTore āñsuoñ se bhar ga.e haiñ

jinheñ sūraj ne bhī dekhā na hogā

vo nañge paañv nañge sar ga.e haiñ

vo kab ke jā base us paar lekin

ka.ī yādeñ yahāñ bhī dhar ga.e haiñ

jinheñ thā shauq mela dekhne kā

vo saare log apne ghar ga.e haiñ

hamāre ahd kā ye alamiya hai

ujāle tīrgī se Dar ga.e haiñ

tū un ko DhūñDhtā phirtā hai 'hasrat'

jo duniyā se kinārā kar ga.e haiñ

lab-e-dariya jo pyase mar gae hain

junun ka nam raushan kar gae hain

husaini qafila jab yaad aaya

kaTore aansuon se bhar gae hain

jinhen suraj ne bhi dekha na hoga

wo nange panw nange sar gae hain

wo kab ke ja base us par lekin

kai yaaden yahan bhi dhar gae hain

jinhen tha shauq mela dekhne ka

wo sare log apne ghar gae hain

hamare ahd ka ye alamiya hai

ujale tirgi se Dar gae hain

tu un ko DhunDhta phirta hai 'hasrat'

jo duniya se kinara kar gae hain