lab-e-fasurda ko saghar talash karta hai

lab-e-fasurda ko sāġhar talāsh kartā hai

shikasta naav ko langar talāsh kartā hai

vo kaun shaḳhs thā jo dasht-e-zulmat-e-ġham meñ

masarratoñ kā samundar talāsh kartā hai

zarūr chheḌegā haq kī laḌā.ī kāġhaz par

qalam ḳhayāl kā lashkar talāsh kartā hai

safar jo kartā hai himmat kī rahnumā.ī meñ

qadam qadam pe vo Thokar talāsh kartā hai

ġhazal ke jism pe bāzār-e-fan kā saudāgar

taḳhayyulāt kā zevar talāsh kartā hai

jo chāñd maan luuñ us ko to maan luuñ kaise

jo ḳhud charāġh-e-munavvar talāsh kartā hai

'qamar' ko shām-o-sahar hai talāsh-e-fikr-o-nazar

jo jauharī hai vo gauhar talāsh kartā hai

lab-e-fasurda ko saghar talash karta hai

shikasta naw ko langar talash karta hai

wo kaun shaKHs tha jo dasht-e-zulmat-e-gham mein

masarraton ka samundar talash karta hai

zarur chheDega haq ki laDai kaghaz par

qalam KHayal ka lashkar talash karta hai

safar jo karta hai himmat ki rahnumai mein

qadam qadam pe wo Thokar talash karta hai

ghazal ke jism pe bazar-e-fan ka saudagar

taKHayyulat ka zewar talash karta hai

jo chand man lun us ko to man lun kaise

jo KHud charagh-e-munawwar talash karta hai

'qamar' ko sham-o-sahar hai talash-e-fikr-o-nazar

jo jauhari hai wo gauhar talash karta hai