lab-e-KHamosh ko arman-e-guftugu hi sahi

lab-e-ḳhamosh ko armān-e-guftugū hī sahī

jigar meñ hausla-e-arz-e-ārzū hī sahī

asar qubūl hai mujh ko badaltī qadroñ kā

rag-e-hayāt meñ aslāf kā lahū hī sahī

namāz-e-ishq adā ho rahī hai maqtal meñ

ye pur-ḳhulūs ibādat hai be-vuzū hī sahī

use bhī ḳhauf hai gulshan meñ zard mausam kā

vo surḳh phuul kī mānind sho.ala-rū hī sahī

junūn-e-ishq ke lashkar se haar jā.egī

sipāh-e-hosh-o-ḳhirad laakh jañg-jū hī sahī

vo merī tishnagī-e-dil bujhā nahīñ saktā

khanaktā jaam chhalaktā huā subū hī sahī

maiñ ek harf-e-malāmat huuñ us ke dāman par

vo merī paak mohabbat kī aabrū hī sahī

mirī nigāh kā markaz nahīñ to kuchh bhī nahīñ

vo ḳhud-pasand nigāhoñ meñ ḳhūb-rū hī sahī

'sabā' ki shā.ir-e-ḳhush-fikr hai magar gumnām

har ek us se hai vāqif vo ḳhush-gulū hī sahī

lab-e-KHamosh ko arman-e-guftugu hi sahi

jigar mein hausla-e-arz-e-arzu hi sahi

asar qubul hai mujh ko badalti qadron ka

rag-e-hayat mein aslaf ka lahu hi sahi

namaz-e-ishq ada ho rahi hai maqtal mein

ye pur-KHulus ibaadat hai be-wuzu hi sahi

use bhi KHauf hai gulshan mein zard mausam ka

wo surKH phul ki manind shoala-ru hi sahi

junun-e-ishq ke lashkar se haar jaegi

sipah-e-hosh-o-KHirad lakh jang-ju hi sahi

wo meri tishnagi-e-dil bujha nahin sakta

khanakta jam chhalakta hua subu hi sahi

main ek harf-e-malamat hun us ke daman par

wo meri pak mohabbat ki aabru hi sahi

meri nigah ka markaz nahin to kuchh bhi nahin

wo KHud-pasand nigahon mein KHub-ru hi sahi

'saba' ki shair-e-KHush-fikr hai magar gumnam

har ek us se hai waqif wo KHush-gulu hi sahi