lab pe ek nam jab aata hai to ro lete hain

lab pe ik naam jab aatā hai to ro lete haiñ

koī jī-bhar ke rulātā hai to ro lete haiñ

chāñdnī-rāt kī mahkī huī tanhā.ī meñ

sāz-e-ġham par koī gaatā hai to ro lete haiñ

nūr-o-nik.hat kī fazāoñ kā dil-āvez samāñ

dil meñ jab aag lagātā hai to ro lete haiñ

aaj bhī hādsa-e-dard-e-mohabbat kī qasam

pyaar jab koī baḌhātā hai to ro lete haiñ

ārzūoñ kī ujāḌī huī mahfil meñ kahīñ

sham-e-dil koī jalātā hai to ro lete haiñ

koī anjān masīhā koī ġham kā sāthī

qissa-e-dard sunātā hai to ro lete haiñ

dil kī galiyoñ se tasavvur kī hasīñ vaadī se

jab koī ruuTh ke jaatā hai to ro lete haiñ

jaane kis zaḳhm-e-mohabbat kā ḳhayāl aatā hai

pyaar se koī bulātā hai to ro lete haiñ

ab bhī ummīd ke so.e hue zaḳhmoñ ko 'ra.īs'

jab koī aa ke jagātā hai to ro lete haiñ

lab pe ek nam jab aata hai to ro lete hain

koi ji-bhar ke rulata hai to ro lete hain

chandni-raat ki mahki hui tanhai mein

saz-e-gham par koi gata hai to ro lete hain

nur-o-nikhat ki fazaon ka dil-awez saman

dil mein jab aag lagata hai to ro lete hain

aaj bhi hadsa-e-dard-e-mohabbat ki qasam

pyar jab koi baDhata hai to ro lete hain

aarzuon ki ujaDi hui mahfil mein kahin

sham-e-dil koi jalata hai to ro lete hain

koi anjaan masiha koi gham ka sathi

qissa-e-dard sunata hai to ro lete hain

dil ki galiyon se tasawwur ki hasin wadi se

jab koi ruTh ke jata hai to ro lete hain

jaane kis zaKHm-e-mohabbat ka KHayal aata hai

pyar se koi bulata hai to ro lete hain

ab bhi ummid ke soe hue zaKHmon ko 'rais'

jab koi aa ke jagata hai to ro lete hain