lab pe kanTon ke hai fariyaad-o-buka mere baad

lab pe kāñToñ ke hai fariyād-o-bukā mere baad

koī aayā hī nahīñ ābla-pā mere baad

mere dam tak hī rahā rabt-e-nasīm o ruḳh-e-gul

nik.hat-āmez nahīñ mauj-e-sabā mere baad

ab na vo rañg-e-jabīñ hai na bahār-e-āriz

lāla-rūyoñ kā ajab haal huā mere baad

chand sūkhe hue patte haiñ chaman meñ raqsāñ

haa.e begānagi-e-āb-o-havā mere baad

muñh dhulātī nahīñ ġhunchoñ kā urūs-e-shabnam

gard-ālūd hai kaliyoñ kī qabā mere baad

ādmiyyat-shiknī bhī to nahīñ kam 'anvar'

Dar hai kuchh aur na ho is ke sivā mere baad

lab pe kanTon ke hai fariyaad-o-buka mere baad

koi aaya hi nahin aabla-pa mere baad

mere dam tak hi raha rabt-e-nasim o ruKH-e-gul

nikhat-amez nahin mauj-e-saba mere baad

ab na wo rang-e-jabin hai na bahaar-e-ariz

lala-ruyon ka ajab haal hua mere baad

chand sukhe hue patte hain chaman mein raqsan

hae beganagi-e-ab-o-hawa mere baad

munh dhulati nahin ghunchon ka urus-e-shabnam

gard-alud hai kaliyon ki qaba mere baad

aadmiyyat-shikni bhi to nahin kam 'anwar'

Dar hai kuchh aur na ho is ke siwa mere baad