labon ko khol to kaisa bhi ho jawab to de

laboñ ko khol to kaisā bhī ho javāb to de

na baañT sūd-o-ziyāñ ko magar hisāb to de

vafā, ḳhulūs o mohabbat ko phir samajhnā hai

kahāñ likhe haiñ ye alfāz tū kitāb to de

ab is tarah bhī rivāyat se inhirāf na kar

badal agarche tū achchhā na de, ḳharāb to de

ye kyā ki apnī hī raftār par hai vo nāzāñ

kisī ke reñgte qadmoñ ko āb-o-tāb to de

chhalak rahā hai zamāne ke sabr kā pyāla

hamāre ahd ke fir.aun ko azaab to de

tapish ne vaqt kī jhulsā ke un ko rakkhā hai

ḳhizāñ-nasīboñ ko thoḌā sahī shabāb to de

hai iḳhtiyār meñ jitnā tire tū utnā to kar

na mil sake koī ta.abīr, un ko ḳhvāb to de

maiñ terī tañg-nigāhī kī kyā karūñ tāvīl

sulagtī ā.ankhoñ ko paanī na de sarāb to de

yuuñ nasl-e-nau kī zehānat ko mumtahin na parakh

jise paḌhe ye na.ī nasl vo kitāb to de

kisī ko kyā hai ġharaz jo paḌhe tirī rūdād

kare appeal kisī ko vo ek baab to de

taḌap rahī hai zamīñ kab se munsifī ke liye

nabī nahīñ to zamāne ko 'bū-turāb' to de

labon ko khol to kaisa bhi ho jawab to de

na banT sud-o-ziyan ko magar hisab to de

wafa, KHulus o mohabbat ko phir samajhna hai

kahan likhe hain ye alfaz tu kitab to de

ab is tarah bhi riwayat se inhiraf na kar

badal agarche tu achchha na de, KHarab to de

ye kya ki apni hi raftar par hai wo nazan

kisi ke rengte qadmon ko aab-o-tab to de

chhalak raha hai zamane ke sabr ka pyala

hamare ahd ke firaun ko azab to de

tapish ne waqt ki jhulsa ke un ko rakkha hai

KHizan-nasibon ko thoDa sahi shabab to de

hai iKHtiyar mein jitna tere tu utna to kar

na mil sake koi tabir, un ko KHwab to de

main teri tang-nigahi ki kya karun tawil

sulagti aaankhon ko pani na de sarab to de

yun nasl-e-nau ki zehanat ko mumtahin na parakh

jise paDhe ye nai nasl wo kitab to de

kisi ko kya hai gharaz jo paDhe teri rudad

kare appeal kisi ko wo ek bab to de

taDap rahi hai zamin kab se munsifi ke liye

nabi nahin to zamane ko 'bu-turab' to de