laDaen aankh wo tirchhi nazar ka war rahne den

laḌā.eñ aañkh vo tirchhī nazar kā vaar rahne deñ

laḌakpan hai abhī nām-e-ḳhudā talvār rahne deñ

kaheñ kis muñh se apnā ā.īna-bardār rahne deñ

tamannā hai ġhulāmī meñ hameñ sarkār rahne deñ

vo kyuuñ 'beḳhud' ko mahv-e-lazzat-e-dīdār rahne deñ

vo dīvāne nahīñ ġhāfil ko jo hushyār rahne deñ

mire dam tak vafā o ishq bhī duniyā meñ baaqī haiñ

masīhā.ī yahī hai vo mujhe bīmār rahne deñ

qayāmat aa ga.ī ab to galā murdār kā kāTeñ

kahāñ tak maut ko zinda tire bīmār rahne deñ

isī parde ne umr-e-ḳhizr shauq-e-dīd ko baḳhshī

qayāmat tak vo apnī garmi-e-bāzār rahne deñ

sun ai qāsid unheñ zid hai to ham ko baat kī pach hai

munāsib vo agar samjheñ to ye takrār rahne deñ

mire mātam kī kyā jaldī hai kyuuñ zevar baḌhāte haiñ

abhī ārāsta vo husn kā bāzār rahne deñ

agar munkar nakīr aate haiñ turbat meñ to aa jaa.eñ

na chheḌeñ vo mujhe mahv-e-jamāl-e-yār rahne deñ

qafas meñ bekasoñ ko kis ne pūchhā kaun pūchhegā

kahāñ tak zaḳhm kī sūrat meñ vā minqār rahne deñ

nigāh-e-sharm ke zaḳhmī haiñ teġh-e-nāz ke bismil

taḌapne ke liye ham ko pas-e-dīvār rahne deñ

ye fiqre haiñ ye chāleñ haiñ nazar lākhoñ meñ uTh jaatī

udū ke sāmne vo ho ga.e nā-chār rahne deñ

jigar meñ dard dil meñ Tiis dam ghuTne lagā apnā

bhalā ham ek ghar meñ aur do bīmār rahne deñ

mohabbat se hameñ nafrat hasīnoñ se hameñ vahshat

dil-āzārī kī bāteñ ab ye dil-āzār rahne deñ

hamāre kaan lafz-e-bevafā sun hī nahīñ sakte

ye ḳhil.at to udū ke vāste sarkār rahne deñ

mirī turbat pe un ko sarf-e-bejā kī zarūrat kyā

kabhī kaam aa.egā ye fitna-e-raftār rahne deñ

muqaddar ko badal deñ vo zamāne ko ḳhafā kar deñ

magar apne tasavvur ko mirā ġham-ḳhvār rahne deñ

nazar un kī kahīñ putlī kahīñ āñkheñ kahīñ un kī

ye gardish dūsrī sūrat kī hai purkār rahne deñ

vo kyuuñ mujh ko tasallī deñ vo kyuuñ pochheñ mire aañsū

ghirā hai abr-e-ġham āñkhoñ ko gauhar-bār rahne deñ

koī 'beḳhud' kī jānib se zarā samjhā.e vaa.iz ko

ibādat ko farishte haiñ use mai-ḳhvār rahne deñ

laDaen aankh wo tirchhi nazar ka war rahne den

laDakpan hai abhi nam-e-KHuda talwar rahne den

kahen kis munh se apna aaina-bardar rahne den

tamanna hai ghulami mein hamein sarkar rahne den

wo kyun 'beKHud' ko mahw-e-lazzat-e-didar rahne den

wo diwane nahin ghafil ko jo hushyar rahne den

mere dam tak wafa o ishq bhi duniya mein baqi hain

masihai yahi hai wo mujhe bimar rahne den

qayamat aa gai ab to gala murdar ka kaTen

kahan tak maut ko zinda tere bimar rahne den

isi parde ne umr-e-KHizr shauq-e-did ko baKHshi

qayamat tak wo apni garmi-e-bazar rahne den

sun ai qasid unhen zid hai to hum ko baat ki pach hai

munasib wo agar samjhen to ye takrar rahne den

mere matam ki kya jaldi hai kyun zewar baDhate hain

abhi aarasta wo husn ka bazar rahne den

agar munkar nakir aate hain turbat mein to aa jaen

na chheDen wo mujhe mahw-e-jamal-e-yar rahne den

qafas mein bekason ko kis ne puchha kaun puchhega

kahan tak zaKHm ki surat mein wa minqar rahne den

nigah-e-sharm ke zaKHmi hain tegh-e-naz ke bismil

taDapne ke liye hum ko pas-e-diwar rahne den

ye fiqre hain ye chaalen hain nazar lakhon mein uTh jati

udu ke samne wo ho gae na-chaar rahne den

jigar mein dard dil mein Tis dam ghuTne laga apna

bhala hum ek ghar mein aur do bimar rahne den

mohabbat se hamein nafrat hasinon se hamein wahshat

dil-azari ki baaten ab ye dil-azar rahne den

hamare kan lafz-e-bewafa sun hi nahin sakte

ye KHilat to udu ke waste sarkar rahne den

meri turbat pe un ko sarf-e-beja ki zarurat kya

kabhi kaam aaega ye fitna-e-raftar rahne den

muqaddar ko badal den wo zamane ko KHafa kar den

magar apne tasawwur ko mera gham-KHwar rahne den

nazar un ki kahin putli kahin aankhen kahin un ki

ye gardish dusri surat ki hai purkar rahne den

wo kyun mujh ko tasalli den wo kyun pochhen mere aansu

ghira hai abr-e-gham aankhon ko gauhar-bar rahne den

koi 'beKHud' ki jaanib se zara samjhae waiz ko

ibaadat ko farishte hain use mai-KHwar rahne den