lafz abhi ijad honge har zarurat ke liye

lafz abhī ījād hoñge har zarūrat ke liye

sharh-e-rāhat ke liye ġham kī sarāhat ke liye

ab mirā chup-chāp rahnā amr-e-majbūrī sahī

maiñ ne kholī hī zabāñ kab thī shikāyat ke liye

mere chashm-o-gosh-o-lab se pūchh lo sab kuchh yahīñ

mujh ko mere sāmne laao shahādat ke liye

saḳht-koshī saḳht-jānī kī taraf laa.ī mujhe

mujh ko ye fursat ġhanīmat hai alālat ke liye

oxigen se shabistān-e-anāsir tābnāk

muztarib har zī-nafas us kī rifāqat ke liye

mar ga.e kuchh log jiine kā mudāvā soch kar

aur kuchh jiite rahe jiine kī aadat ke liye

aah marg-e-ādmī par aadmī ro.e bahut

koī bhī royā na marg-e-ādamiyat ke liye

koī mauqa zindagī kā āḳhirī mauqa nahīñ

is qadar tājīl kyoñ raf-e-kudūrat ke liye

istaqāmat ai mire dair-āshnā-e-ġham-gusār

ek aañsū hai bahut husn-e-nadāmat ke liye

koī 'nāsir' kī ġhazal koī zafar kī mai-tarañg

chāhiye kuchh to mirī shām-e-ayādat ke liye

gulshan-ābād-e-jahāñ meñ sūrat-e-shabnam 'hafīz'

ham agar ro.e bhī to rone kī fursat ke liye

lafz abhi ijad honge har zarurat ke liye

sharh-e-rahat ke liye gham ki sarahat ke liye

ab mera chup-chap rahna amr-e-majburi sahi

main ne kholi hi zaban kab thi shikayat ke liye

mere chashm-o-gosh-o-lab se puchh lo sab kuchh yahin

mujh ko mere samne lao shahadat ke liye

saKHt-koshi saKHt-jaani ki taraf lai mujhe

mujh ko ye fursat ghanimat hai alalat ke liye

oxigen se shabistan-e-anasir tabnak

muztarib har zi-nafas us ki rifaqat ke liye

mar gae kuchh log jine ka mudawa soch kar

aur kuchh jite rahe jine ki aadat ke liye

aah marg-e-admi par aadmi roe bahut

koi bhi roya na marg-e-adamiyat ke liye

koi mauqa zindagi ka aaKHiri mauqa nahin

is qadar tajil kyon raf-e-kudurat ke liye

istaqamat ai mere dair-ashna-e-gham-gusar

ek aansu hai bahut husn-e-nadamat ke liye

koi 'nasir' ki ghazal koi zafar ki mai-tarang

chahiye kuchh to meri sham-e-ayaadat ke liye

gulshan-abaad-e-jahan mein surat-e-shabnam 'hafiz'

hum agar roe bhi to rone ki fursat ke liye