lafzon ka ye KHazana tere nam kab hua

lafzoñ kā ye ḳhazāna tire naam kab huā

ye sher kab kahe tujhe ilhām kab huā

ye baat Thiik hai ki mujhe daam kam mile

chupke se bik gayā huuñ maiñ nīlām kab huā

kaisī sharāb huuñ ki hai tishna mire hī lab

apne liye maiñ durd-e-tah-e-jām kab huā

ye hai mirā nasīb ki shohrat nahīñ milī

lekin koī batā.e ki bad-nām kab huā

aatā rahā huuñ yaad maiñ us ko tamām umr

is zāviye se ishq meñ nākām kab huā

vo hādse ki zehn hī maflūj ho ga.e

ye bhī nahīñ hai yaad ki kohrām kab huā

ab ho rahā hai zikr-e-musāvāt har taraf

logoñ ko ilm hai ye chalan aam kab huā

lafzon ka ye KHazana tere nam kab hua

ye sher kab kahe tujhe ilham kab hua

ye baat Thik hai ki mujhe dam kam mile

chupke se bik gaya hun main nilam kab hua

kaisi sharab hun ki hai tishna mere hi lab

apne liye main durd-e-tah-e-jam kab hua

ye hai mera nasib ki shohrat nahin mili

lekin koi batae ki bad-nam kab hua

aata raha hun yaad main us ko tamam umr

is zawiye se ishq mein nakaam kab hua

wo hadse ki zehn hi mafluj ho gae

ye bhi nahin hai yaad ki kohram kab hua

ab ho raha hai zikr-e-musawat har taraf

logon ko ilm hai ye chalan aam kab hua