laga ke dil koi kuchh pal amir rahta hai

lagā ke dil koī kuchh pal amiir rahtā hai

phir ik umr vo ġham meñ asiir rahtā hai

kyuuñ haath dil se lagāte ho baar baar apnā

kyā dil meñ ab bhī koī be-nazīr rahtā hai

tirī zabāñ pe qanā.at kī baat Thiik nahīñ

tire badan pe libās-e-harīr rahtā hai

yaqīn aa gayā in mehrbāñ havāoñ se

usī galī meñ mirā dast-gīr rahtā hai

tire firāq kā ġham vo hai ki dilāse ko

tā-sub.h baam pe māh-e-munīr rahtā hai

phir ahl-e-ishq kī taḳhlīq hotī hai pahle

junūñ kī aag meñ barsoñ ḳhamīr rahtā hai

laga ke dil koi kuchh pal amir rahta hai

phir ek umr wo gham mein asir rahta hai

kyun hath dil se lagate ho bar bar apna

kya dil mein ab bhi koi be-nazir rahta hai

teri zaban pe qanaat ki baat Thik nahin

tere badan pe libas-e-harir rahta hai

yaqin aa gaya in mehrban hawaon se

usi gali mein mera dast-gir rahta hai

tere firaq ka gham wo hai ki dilase ko

ta-subh baam pe mah-e-munir rahta hai

phir ahl-e-ishq ki taKHliq hoti hai pahle

junun ki aag mein barson KHamir rahta hai