لگتا نہیں کہیں بھی مرا دل ترے بغیر

لگتا نہیں کہیں بھی مرا دل ترے بغیر

دونوں جہاں نہیں مرے قابل ترے بغیر

کچھ لطف زندگی نہیں حاصل ترے بغیر

پل بھر گزارنا بھی ہے مشکل ترے بغیر

تو ہی نہیں تو کون کرے میری رہبری

کٹتی نہیں حیات کی منزل ترے بغیر

دل پر مرے ہی شاق نہیں ہے ترا فراق

خاموش ہیں چمن میں عنادل ترے بغیر

پھولوں کے ابتسام پہ آتی ہے اب ہنسی

ایسا بجھا ہوا ہے مرا دل ترے بغیر

ہوش و ہواس و عقل و خرد دے گئے جواب

یعنی نہیں ہوں میں کسی قابل ترے بغیر

ہر دم یہ سوچ ہے مرے جینے سے فائدہ

جب مقصد حیات ہے باطل ترے بغیر

تکمیل آرزو سے ہے تکمیل زندگی

کیونکر ہو زندگی مری کامل ترے بغیر

کشتی نکل تو آئی ہے گرداب سے مگر

دل ڈوبنے لگا لب ساحل ترے بغیر

ہر دم تڑپ کے لوٹتا پھرتا ہوں خاک پر

گویا بنا ہوں طائر بسمل ترے بغیر

آنکھیں ہی پہلے روتی تھیں اب تو یہ قہر ہے

رونے لگا ہے خون مرا دل ترے بغیر

نادرؔ کو جان دینے سے کیوں روکتا ہے تو

جینے سے بھی ہے کیا اسے حاصل ترے بغیر