lahje ka ras hansi ki dhanak chhoD kar gaya

lahje kā ras hañsī kī dhanak chhoḌ kar gayā

vo jaate jaate dil meñ kasak chhoḌ kar gayā

mauj-e-havā-e-gul sā vo guzrā thā ek baar

phir bhī mashām-e-jāñ meñ mahak chhoḌ kar gayā

aayā thā pichhlī raat dabe paañv mere ghar

pāzeb kī ragoñ meñ jhanak chhoḌ kar gayā

larza giraft-e-lams kī lazzat se baar baar

bāñhoñ meñ shāḳh-e-gul kī lachak chhoḌ kar gayā

aayā thā shahr-e-gul se bulāvā mire liye

zindāñ meñ beḌiyoñ kī chhanak chhoḌ kar gayā

thā dekhnā kuchh apnā tilism-e-hunar use

bāġh-e-bahisht o huur o malak chhoḌ kar gayā

āvāra kū-ba-kū ye use DhūñDhtī phire

pā-e-havā meñ kaisī sanak chhoḌ kar gayā

hañste the zaḳhm aur bhī khā khā ke zarb-e-sañg

rāhoñ meñ phuul duur talak chhoḌ kar gayā

hāthoñ meñ de ke khīñch liiñ resham-kalā.iyāñ

kamre meñ chūḌiyoñ kī khanak chhoḌ kar gayā

āñkheñ na us kī bār-e-nadāmat se uTh sakīñ

zaḳhmoñ pe mere aur namak chhoḌ kar gayā

palkoñ pe jugnuoñ kā baserā hai vaqt-e-shām

'anjum' maiñ pāniyoñ meñ chamak chhoḌ kar gayā

lahje ka ras hansi ki dhanak chhoD kar gaya

wo jate jate dil mein kasak chhoD kar gaya

mauj-e-hawa-e-gul sa wo guzra tha ek bar

phir bhi masham-e-jaan mein mahak chhoD kar gaya

aaya tha pichhli raat dabe panw mere ghar

pazeb ki ragon mein jhanak chhoD kar gaya

larza giraft-e-lams ki lazzat se bar bar

banhon mein shaKH-e-gul ki lachak chhoD kar gaya

aaya tha shahr-e-gul se bulawa mere liye

zindan mein beDiyon ki chhanak chhoD kar gaya

tha dekhna kuchh apna tilism-e-hunar use

bagh-e-bahisht o hur o malak chhoD kar gaya

aawara ku-ba-ku ye use DhunDhti phire

pa-e-hawa mein kaisi sanak chhoD kar gaya

hanste the zaKHm aur bhi kha kha ke zarb-e-sang

rahon mein phul dur talak chhoD kar gaya

hathon mein de ke khinch lin resham-kalaiyan

kamre mein chuDiyon ki khanak chhoD kar gaya

aankhen na us ki bar-e-nadamat se uTh sakin

zaKHmon pe mere aur namak chhoD kar gaya

palkon pe jugnuon ka basera hai waqt-e-sham

'anjum' main paniyon mein chamak chhoD kar gaya