lahr ki tarah kinare se uchhal jaana hai

lahr kī tarah kināre se uchhal jaanā hai

dekhte dekhte hāthoñ se nikal jaanā hai

dopahar vo hai ki hotī nazar aatī hī nahīñ

din hamārā to bahut pahle hī Dhal jaanā hai

jī hamārā bhī yahāñ ab nahīñ lagtā itnā

aaj agar rok liye jaa.eñ to kal jaanā hai

dil meñ khiltā huā ik āḳhirī ḳhvāhish kā ye phuul

jaate jaate ise ḳhud maiñ ne masal jaanā hai

jo yahāñ ḳhud hī lagā rakkhī hai chāroñ jānib

ek din ham ne isī aag meñ jal jaanā hai

chaltī ruktī huī ye husn bhī hai ek havā

mausam-e-ishq bhī ik roz badal jaanā hai

jaise ghuTTī meñ koī ḳhauf paḌā ho is kī

bāt-be-bāt hī is dil ne dahal jaanā hai

aur to honī hai kyā apnī vasūlī us se

muñh pe kālak ye mulāqāt kī mal jaanā hai

maiñ bhī kuchh der se baiThā huuñ nishāne pe 'zafar'

aur vo kheñchā huā tiir bhī chal jaanā hai

lahr ki tarah kinare se uchhal jaana hai

dekhte dekhte hathon se nikal jaana hai

dopahar wo hai ki hoti nazar aati hi nahin

din hamara to bahut pahle hi Dhal jaana hai

ji hamara bhi yahan ab nahin lagta itna

aaj agar rok liye jaen to kal jaana hai

dil mein khilta hua ek aaKHiri KHwahish ka ye phul

jate jate ise KHud main ne masal jaana hai

jo yahan KHud hi laga rakkhi hai chaaron jaanib

ek din hum ne isi aag mein jal jaana hai

chalti rukti hui ye husn bhi hai ek hawa

mausam-e-ishq bhi ek roz badal jaana hai

jaise ghuTTi mein koi KHauf paDa ho is ki

baat-be-baat hi is dil ne dahal jaana hai

aur to honi hai kya apni wasuli us se

munh pe kalak ye mulaqat ki mal jaana hai

main bhi kuchh der se baiTha hun nishane pe 'zafar'

aur wo khencha hua tir bhi chal jaana hai