lahu hi kitna hai jo chashm-e-tar se niklega

lahū hī kitnā hai jo chashm-e-tar se niklegā

yahāñ bhī kaam na arz-e-hunar se niklegā

har ek shaḳhs hai be-samtiyoñ kī dhund meñ gum

batā.e kaun ki sūraj kidhar se niklegā

karo jo kar sako bikhre hue vajūd ko jamā

ki kuchh na kuchh to ġhubār-e-safar se niklegā

maiñ apne aap se mil kar huā bahut māyūs

ḳhabar thī garm ki vo aaj ghar se niklegā

haiñ barf barf abhī mere ahd kī rāteñ

ufuq jaleñge to shola sahar se niklegā

ye kyā ḳhabar thī ki ai rañj-e-rā.egāñ-nafsī

dhuāñ bhī sīna-e-ahl-e-nazar se niklegā

mirī zamīñ ne ḳhalā meñ bhī khīñch dī dīvār

tū āsmāñ sahī kis rahguzar se niklegā

tamām log isī hasrat meñ dhuup dhuup jale

kabhī to saaya ghanere shajar se niklegā

samo na tāroñ meñ mujh ko ki huuñ vo sail-e-navā

jo zindagī ke lab-e-mo'tabar se niklegā

phirā huuñ kaasa liye lafz lafz ke pīchhe

tamām umr ye saudā na sar se niklegā

'fazā' matā-e-qalam ko sambhāl kar rakkho

ki āftāb isī durj-e-guhar se niklegā

lahu hi kitna hai jo chashm-e-tar se niklega

yahan bhi kaam na arz-e-hunar se niklega

har ek shaKHs hai be-samtiyon ki dhund mein gum

batae kaun ki suraj kidhar se niklega

karo jo kar sako bikhre hue wajud ko jama

ki kuchh na kuchh to ghubar-e-safar se niklega

main apne aap se mil kar hua bahut mayus

KHabar thi garm ki wo aaj ghar se niklega

hain barf barf abhi mere ahd ki raaten

ufuq jalenge to shola sahar se niklega

ye kya KHabar thi ki ai ranj-e-raegan-nafsi

dhuan bhi sina-e-ahl-e-nazar se niklega

meri zamin ne KHala mein bhi khinch di diwar

tu aasman sahi kis rahguzar se niklega

tamam log isi hasrat mein dhup dhup jale

kabhi to saya ghanere shajar se niklega

samo na taron mein mujh ko ki hun wo sail-e-nawa

jo zindagi ke lab-e-mo'tabar se niklega

phira hun kasa liye lafz lafz ke pichhe

tamam umr ye sauda na sar se niklega

'faza' mata-e-qalam ko sambhaal kar rakkho

ki aaftab isi durj-e-guhar se niklega