lahu ki bund misl-e-aina har dar pe rakkhi thi

lahū kī buuñd misl-e-ā.ina har dar pe rakkhī thī

sanad ahl-e-vafā kī lāsha-e-be-sar pe rakkhī thī

nigāheñ vaqt kī kaise nazar-andāz kar detīñ

asās-e-gulsitāñ katre hue shahpar pe rakkhī thī

anā majrūh ho jaatī qadam pīchhe agar haTte

binā-e-qurb dohrī dhaar ke ḳhanjar pe rakkhī thī

idhar ham sar hathelī par liye maqtal meñ pahuñche the

udhar qātil ne ghabrā kar hathelī sar pe rakkhī thī

ḳhudī kī raushnī meñ maiñ ne dekhā hai aqīdat ko

ḳhudā.ī varna aazar kī mirī Thokar pe rakkhī thī

ḳhulūs-o-mehr ke paanī ne ThanDā kar diyā āḳhir

jo tum ne aag nafrat kī dil-e-muztar pe rakkhī thī

liyā jaatā na kaise imtihān-e-zarf ai 'sāqī'

nazar har ek bāda-ḳhvār ne sāġhar pe rakkhī thī

lahu ki bund misl-e-aina har dar pe rakkhi thi

sanad ahl-e-wafa ki lasha-e-be-sar pe rakkhi thi

nigahen waqt ki kaise nazar-andaz kar detin

asas-e-gulsitan katre hue shahpar pe rakkhi thi

ana majruh ho jati qadam pichhe agar haTte

bina-e-qurb dohri dhaar ke KHanjar pe rakkhi thi

idhar hum sar hatheli par liye maqtal mein pahunche the

udhar qatil ne ghabra kar hatheli sar pe rakkhi thi

KHudi ki raushni mein main ne dekha hai aqidat ko

KHudai warna aazar ki meri Thokar pe rakkhi thi

KHulus-o-mehr ke pani ne ThanDa kar diya aaKHir

jo tum ne aag nafrat ki dil-e-muztar pe rakkhi thi

liya jata na kaise imtihan-e-zarf ai 'saqi'

nazar har ek baada-KHwar ne saghar pe rakkhi thi