lahu mein phul khilane kahan se aate hain

lahū meñ phuul khilāne kahāñ se aate haiñ

na.e ḳhayāl na jaane kahāñ se aate haiñ

ye kaun log haiñ har shaam tāq-e-mizhgāñ par

charāġh-e-yād jalāne kahāñ se aate haiñ

ḳhizāñ kī shāḳh meñ hairāñ hai aañkh kī koñpal

palaT ke ahd purāne kahāñ se aate haiñ

samundaroñ ko sikhātā hai kaun tarz-e-ḳhirām

zamīñ kī tah meñ ḳhazāne kahāñ se aate haiñ

zamām-e-abr gurezāñ hai kis ke hāthoñ meñ

muhīt-e-ḳhosha meñ daane kahāñ se aate haiñ

safar-e-nasīb parindo! tumhāre hoñToñ par

ye ḳhush-gavār tarāne kahāñ se aate haiñ

ḳhushī ke ahd chale jaate haiñ kahāñ 'sayyad'

udāsiyoñ ke zamāne kahāñ se aate haiñ

lahu mein phul khilane kahan se aate hain

nae KHayal na jaane kahan se aate hain

ye kaun log hain har sham taq-e-mizhgan par

charagh-e-yaad jalane kahan se aate hain

KHizan ki shaKH mein hairan hai aankh ki konpal

palaT ke ahd purane kahan se aate hain

samundaron ko sikhata hai kaun tarz-e-KHiram

zamin ki tah mein KHazane kahan se aate hain

zamam-e-abr gurezan hai kis ke hathon mein

muhit-e-KHosha mein dane kahan se aate hain

safar-e-nasib parindo! tumhaare honTon par

ye KHush-gawar tarane kahan se aate hain

KHushi ke ahd chale jate hain kahan 'sayyad'

udasiyon ke zamane kahan se aate hain