lakDi ki do mezen hain ek lohe ki almari hai

lakḌī kī do mezeñ haiñ ik lohe kī almārī hai

ik shā.ir ke kamre jaisī ham ne umr guzārī hai

ek salāḳhoñ vaalī khiḌkī jhāñk rahī hai āñgan meñ

dīvāroñ par uupar nīche ḳhvāboñ kī gul-kārī hai

manzar manzar bhiig rahā hai shahr kī ḳhālī saḌkoñ par

pakkī nahr pe gaañv ke ghoḌe kī Top savārī hai

pyaas bujhāne aate haiñ dukh dard parinde raat ga.e

ḳhvāb kā chashma phūTā thā āñkhoñ meñ ab tak jaarī hai

sandūq purānī yādoñ kā taalā toḌ ke dekhā to

ik resham kī shaal milī hai niile rañg kī saarī hai

vaqt mile to gul-daste kā haath pakaḌ kar aa jaanā

varna kahnā kaam bahut hai aane meñ dushvārī hai

lakDi ki do mezen hain ek lohe ki almari hai

ek shair ke kamre jaisi hum ne umr guzari hai

ek salaKHon wali khiDki jhank rahi hai aangan mein

diwaron par upar niche KHwabon ki gul-kari hai

manzar manzar bhig raha hai shahr ki KHali saDkon par

pakki nahr pe ganw ke ghoDe ki Top sawari hai

pyas bujhane aate hain dukh dard parinde raat gae

KHwab ka chashma phuTa tha aankhon mein ab tak jari hai

sanduq purani yaadon ka tala toD ke dekha to

ek resham ki shaal mili hai nile rang ki sari hai

waqt mile to gul-daste ka hath pakaD kar aa jaana

warna kahna kaam bahut hai aane mein dushwari hai