laKHt-e-jigar ko kyunkar mizhgan-e-tar sambhaale

laḳht-e-jigar ko kyūñkar mizhgān-e-tar sambhāle

ye shāḳh vo nahīñ jo bār-e-samar sambhāle

dīvāna ho ke koī phāḌā kare garebāñ

mumkin nahīñ ki dāman vo be-ḳhabar sambhāle

talvār khīñch kar vo ḳhūñ-ḳhvār hai ye kahtā

muñh par jo khāte Dartā ho vo sipar sambhāle

takiye meñ aadmī ko lāzim kafan hai rakhnā

baiThā rahe musāfir raḳht-e-safar sambhāle

yak dam na nibhne detī un kī tunak-mizājī

rakhte na ham tabī.at apnī agar sambhāle

vo naḳhl-e-ḳhushk huuñ maiñ is gulshan-e-jahāñ meñ

phirtā hai bāġhbāñ bhī mujh par tabar sambhāle

har gaam par ḳhushī se vāraftagī sī hogī

laanā javāb-e-ḳhat ko ai nāma-bar sambhāle

yā phir katar par us ke sayyād yā chhurī pher

be-bāl-o-par ne tere phir bāl-o-par sambhāle

dard-e-firāq 'ātish' taḌpā rahā hai ham ko

ik haath dil sambhāle hai ik jigar sambhāle

laKHt-e-jigar ko kyunkar mizhgan-e-tar sambhaale

ye shaKH wo nahin jo bar-e-samar sambhaale

diwana ho ke koi phaDa kare gareban

mumkin nahin ki daman wo be-KHabar sambhaale

talwar khinch kar wo KHun-KHwar hai ye kahta

munh par jo khate Darta ho wo sipar sambhaale

takiye mein aadmi ko lazim kafan hai rakhna

baiTha rahe musafir raKHt-e-safar sambhaale

yak dam na nibhne deti un ki tunak-mizaji

rakhte na hum tabiat apni agar sambhaale

wo naKHl-e-KHushk hun main is gulshan-e-jahan mein

phirta hai baghban bhi mujh par tabar sambhaale

har gam par KHushi se waraftagi si hogi

lana jawab-e-KHat ko ai nama-bar sambhaale

ya phir katar par us ke sayyaad ya chhuri pher

be-baal-o-par ne tere phir baal-o-par sambhaale

dard-e-firaq 'atish' taDpa raha hai hum ko

ek hath dil sambhaale hai ek jigar sambhaale