lamha lamha kah rahi hain kuchh fazaen aag ki

lamha lamha kah rahī haiñ kuchh fazā.eñ aag kī

zarra zarra aa rahī haiñ kyā sadā.eñ aag kī

ḳhushk peḌoñ ke laboñ par kyā duā.eñ haiñ suno

chhā rahī haiñ har taraf dekho ghaTā.eñ aag kī

kūcha-o-bāzār bhī dīvār-o-dar bhī aag haiñ

ik ishāra sā hai fasleñ lahlahā.eñ aag kī

aag kī lahreñ haiñ yā logoñ kī sāñseñ haiñ yahāñ

dekhnā ye bastiyāñ ab ban na jaa.eñ aag kī

jism to kab kā jalā ab ruuh tak jaatī hai aañch

chal rahī haiñ tez kaisī ye havā.eñ aag kī

uḌ rahā hai ik bagūlā aag barsātā huā

khetiyāñ sab nazr logo ho na jaa.eñ aag kī

lamha lamha kah rahi hain kuchh fazaen aag ki

zarra zarra aa rahi hain kya sadaen aag ki

KHushk peDon ke labon par kya duaen hain suno

chha rahi hain har taraf dekho ghaTaen aag ki

kucha-o-bazar bhi diwar-o-dar bhi aag hain

ek ishaara sa hai faslen lahlahaen aag ki

aag ki lahren hain ya logon ki sansen hain yahan

dekhna ye bastiyan ab ban na jaen aag ki

jism to kab ka jala ab ruh tak jati hai aanch

chal rahi hain tez kaisi ye hawaen aag ki

uD raha hai ek bagula aag barsata hua

khetiyan sab nazr logo ho na jaen aag ki