lamhon mein ek umr ki mehnat KHarab ki

lamhoñ meñ ek umr kī mehnat ḳharāb kī

is dhuup ne makān kī rañgat ḳharāb kī

raste meñ phuul dekh ke ham log Dar ga.e

kis ne hamāre paañv kī aadat ḳharāb kī

ujlat-pasand haath meñ aa.e hue the ham

kuchh gāhakoñ ne pūchh ke qīmat ḳharāb kī

ya.anī maiñ us ke ba.ad bhī ḳhush huuñ ye soch kar

kamre kī jān-būjh ke hālat ḳharāb kī

vaise ye ishq kaun sā likkhā thā baḳht meñ

ham ne to apnī aap hī qismat ḳharāb kī

kis ne hamāre naam pe beche haiñ qahqahe

kis ne hamāre naam kī shohrat ḳharāb kī

tañg aa ke āsmāñ se nikālā gayā hameñ

thoḌī bahut jo thī yahāñ vaq.at ḳharāb kī

'sāhir' junūn-e-shauq meñ kyā kyā nahīñ kiyā

miTTī palīd kī kabhī izzat ḳharāb kī

lamhon mein ek umr ki mehnat KHarab ki

is dhup ne makan ki rangat KHarab ki

raste mein phul dekh ke hum log Dar gae

kis ne hamare panw ki aadat KHarab ki

ujlat-pasand hath mein aae hue the hum

kuchh gahakon ne puchh ke qimat KHarab ki

yani main us ke baad bhi KHush hun ye soch kar

kamre ki jaan-bujh ke haalat KHarab ki

waise ye ishq kaun sa likkha tha baKHt mein

hum ne to apni aap hi qismat KHarab ki

kis ne hamare nam pe beche hain qahqahe

kis ne hamare nam ki shohrat KHarab ki

tang aa ke aasman se nikala gaya hamein

thoDi bahut jo thi yahan waqat KHarab ki

'sahir' junun-e-shauq mein kya kya nahin kiya

miTTi palid ki kabhi izzat KHarab ki