lamhon ne yun sameT liya fasla bahut

lamhoñ ne yuuñ sameT liyā fāsla bahut

maiñ ne paḌhā to kuchh na thā lekin paḌhā bahut

kitne junūñ-navāz bichhaḌ ke chale ga.e

josh-e-junūñ ke saath na thā valvala bahut

Duubā safīna jis meñ musāfir koī na thā

lekin bhare hue the vahāñ nā-ḳhudā bahut

sau dā.eroñ meñ baT ke numāyāñ na ho sake

socho agar to hogā bas ik dā.era bahut

shāyad yahī kitāb-e-mohabbat ho lā-javāb

merī vafā ke saath hai terī jafā bahut

zaḳhmoñ ke saath saath namak-pāshiyāñ bhī thiiñ

dekhā hai mere ishq ne ye silsila bahut

āñkhoñ meñ dam Tikā hai vo aa jaa.eñ is ghaḌī

dast-e-talab hai mere liye ye duā bahut

tujh ko 'shahīd' sāda-dilī kī nazar lagī

imkān varna tere liye bhī rahā bahut

lamhon ne yun sameT liya fasla bahut

main ne paDha to kuchh na tha lekin paDha bahut

kitne junun-nawaz bichhaD ke chale gae

josh-e-junun ke sath na tha walwala bahut

Duba safina jis mein musafir koi na tha

lekin bhare hue the wahan na-KHuda bahut

sau daeron mein baT ke numayan na ho sake

socho agar to hoga bas ek daera bahut

shayad yahi kitab-e-mohabbat ho la-jawab

meri wafa ke sath hai teri jafa bahut

zaKHmon ke sath sath namak-pashiyan bhi thin

dekha hai mere ishq ne ye silsila bahut

aankhon mein dam Tika hai wo aa jaen is ghaDi

dast-e-talab hai mere liye ye dua bahut

tujh ko 'shahid' sada-dili ki nazar lagi

imkan warna tere liye bhi raha bahut