lan-tarani ka batane ke liye raaz mujhe

lan-tarānī kā batāne ke liye raaz mujhe

kaun detā hai sar-e-tūr ye āvāz mujhe

ishq meñ aur bhī dīvāna banā detī hai

merī āvāz meñ mil kar tirī āvāz mujhe

ruuh āzād thī pāband-e-qafas rah na sakī

uḌ gayā le ke mirā jazba-e-parvāz mujhe

maiñ to jaatā hī thā tañg aa ke adam kī jānib

tum ne kyoñ rok liyā de kar ik āvāz mujhe

ta.ane sab dete haiñ mujh ko mirī mazlūmī kī

kis qadar rahm-o-karam par thā tire naaz mujhe

kaun ab kashmakash-e-zīst se de mujh ko najāt

kar chukā hai mirā qātil nazar-andāz mujhe

dekhte hī unheñ aaheñ bhī haiñ fariyādeñ bhī

'abr' sab aa hī ga.e ishq ke andāz mujhe

lan-tarani ka batane ke liye raaz mujhe

kaun deta hai sar-e-tur ye aawaz mujhe

ishq mein aur bhi diwana bana deti hai

meri aawaz mein mil kar teri aawaz mujhe

ruh aazad thi paband-e-qafas rah na saki

uD gaya le ke mera jazba-e-parwaz mujhe

main to jata hi tha tang aa ke adam ki jaanib

tum ne kyon rok liya de kar ek aawaz mujhe

tane sab dete hain mujh ko meri mazlumi ki

kis qadar rahm-o-karam par tha tere naz mujhe

kaun ab kashmakash-e-zist se de mujh ko najat

kar chuka hai mera qatil nazar-andaz mujhe

dekhte hi unhen aahen bhi hain fariyaaden bhi

'abr' sab aa hi gae ishq ke andaz mujhe