laTon ne uski hai luTa qarar raaton ka

laToñ ne us kī hai luuTā qarār rātoñ kā

kiyā hai dāman-e-dil tār-tār rātoñ kā

huā hai dil ke ufuq par vo badr jab se tulū'

dinoñ meñ hone lagā hai shumār rātoñ kā

kabhī jo zulf-e-siyah tuul de shab-e-ġham ko

to chāñd-chehra kare iḳhtisār rātoñ kā

muhīb tīrgī din kī bhī sāya-afgan hai

hai āftāb bhī nisfunnahār rātoñ kā

masāfateñ haiñ shab-e-hijr kī ki kaTtī nahīñ

agarche pā-ba-rikāb hai savār rātoñ kā

zuhūr-e-fajr huā hai hazār raat ke baa'd

ye mas.ala nahīñ hai tiin chaar rātoñ kā

kuchh is tarah se hoñ ham us ke saath ham-sohbat

ki saath saath ho din ko bhī yaar rātoñ kā

laTon ne us ki hai luTa qarar raaton ka

kiya hai daman-e-dil tar-tar raaton ka

hua hai dil ke ufuq par wo badr jab se tulu'

dinon mein hone laga hai shumar raaton ka

kabhi jo zulf-e-siyah tul de shab-e-gham ko

to chand-chehra kare iKHtisar raaton ka

muhib tirgi din ki bhi saya-afgan hai

hai aaftab bhi nisfunnahaar raaton ka

masafaten hain shab-e-hijr ki ki kaTti nahin

agarche pa-ba-rikab hai sawar raaton ka

zuhur-e-fajr hua hai hazar raat ke ba'd

ye masala nahin hai tin chaar raaton ka

kuchh is tarah se hon hum us ke sath ham-sohbat

ki sath sath ho din ko bhi yar raaton ka