le chuko dil jo nigah ko to ye dushwar nahin

le chuko dil jo nigah ko to ye dushvār nahīñ

lek tum dekhte phirte ho ḳharīdār nahīñ

go ki musharif-ba-halākat huuñ maiñ is baar pe shoḳh

to ayādat ko gar aave to kuchh āzār nahīñ

tañg to ham ko tū ai jaib kare hai lekin

uTh gayā haath gar apnā to phir ik taar nahīñ

go subuk mujh ko zamāne ne kiyā hai lekin

ye bhī hai shukr kisī dil kā to maiñ baar nahīñ

majlis-e-mai se mushābah hai ḳharābāt-e-jahāñ

jaan kar yaañ jo na ho mast so hoshyār nahīñ

har bad o nek jahāñ apnī jagah hai matlūb

kaun sā uzv badan meñ hai ki darkār nahīñ

mai kī tauba ko to muddat huī 'qā.em' lekin

be-talab ab bhī jo mil jaa.e to inkār nahīñ

le chuko dil jo nigah ko to ye dushwar nahin

lek tum dekhte phirte ho KHaridar nahin

go ki musharif-ba-halakat hun main is bar pe shoKH

to ayaadat ko gar aawe to kuchh aazar nahin

tang to hum ko tu ai jaib kare hai lekin

uTh gaya hath gar apna to phir ek tar nahin

go subuk mujh ko zamane ne kiya hai lekin

ye bhi hai shukr kisi dil ka to main bar nahin

majlis-e-mai se mushabah hai KHarabaat-e-jahan

jaan kar yan jo na ho mast so hoshyar nahin

har bad o nek jahan apni jagah hai matlub

kaun sa uzw badan mein hai ki darkar nahin

mai ki tauba ko to muddat hui 'qaem' lekin

be-talab ab bhi jo mil jae to inkar nahin