le ke be-shak hath mein KHanjar chalo

le ke be-shak haath meñ ḳhanjar chalo

oḌh kar iḳhlās kī chādar chalo

koī chingārī na ho is Dher meñ

soch kar in ḳhushk pattoñ par chalo

hādse bāhar khaḌe haiñ ghaat meñ

phir palaT kar ḳhol ke andar chalo

toḌ kar is ḳhāk-dāñ kī sarhadeñ

bādaloñ kī ThanDī saḌkoñ par chalo

fan kī ḳhidmat roTiyāñ detī nahīñ

fan kī ḳhidmat chhoḌ kar daftar chalo

maiñ bhī huuñ patthar banā do aadmī

mujh ko bhī chhūte hue raghubar chalo

zindagī be-dāġh bhī achchhī nahīñ

tohmateñ kuchh zindagī par dhar chalo

ho gayā ruḳhsat gale mil kar koī

tum bhī rakh kar dil par ab patthar chalo

shahr kī miTTī pukāre hai 'shabāb'

ho chukā ban-bās puurā ghar chalo

le ke be-shak hath mein KHanjar chalo

oDh kar iKHlas ki chadar chalo

koi chingari na ho is Dher mein

soch kar in KHushk patton par chalo

hadse bahar khaDe hain ghat mein

phir palaT kar KHol ke andar chalo

toD kar is KHak-dan ki sarhaden

baadalon ki ThanDi saDkon par chalo

fan ki KHidmat roTiyan deti nahin

fan ki KHidmat chhoD kar daftar chalo

main bhi hun patthar bana do aadmi

mujh ko bhi chhute hue raghubar chalo

zindagi be-dagh bhi achchhi nahin

tohmaten kuchh zindagi par dhar chalo

ho gaya ruKHsat gale mil kar koi

tum bhi rakh kar dil par ab patthar chalo

shahr ki miTTi pukare hai 'shabab'

ho chuka ban-bas pura ghar chalo