le ke KHud pir-e-mughan hath mein mina aaya

le ke ḳhud pīr-e-muġhāñ haath meñ miinā aayā

mai-kasho sharm ki is par bhī na piinā aayā

na pilānā kisī mai-kash ko na piinā aayā

tujh ko zāhid agar aayā bhī to kiina aayā

umr bhar ḳhūn-e-jigar baiTh ke piinā aayā

ārzūo tumheñ marnā hameñ jiinā aayā

dil ne dekhā mujhe aur maiñ ne falak ko dekhā

bach ke sāhil pe agar koī safīnā aayā

kisī badmast kī yaad aa ga.iiñ āñkheñ saaqī

jab chhalaktā huā aage mire miinā aayā

ik zarā sī thī kabhī kī ḳhalish us par ai hashr

dil meñ letā huā zāhid vahī kiina aayā

laḌkhaḌānā koī sīkhā koī sīkhā mastī

ham ko aayā to faqat Dhaal ke piinā aayā

ḳhush ho ai chashm ki hai fasl yahī rone kī

muzhda ai abr ki sāvan kā mahīna aayā

pī hī lenī thī jo mai-ḳhāne ko aa niklā thā

tujh ko sohbat kā bhī zāhid na qarīnā aayā

chāhā jo kuchh vo zamāne ne kiyā naqsh is par

maiñ to saada liye is dil kā nagīna aayā

aaj tak dāman-e-gul chaak hai ḳhayyāt-e-azal

tujh ko ḳhil.at bhī hasīnoñ kā na siinā aayā

dekh chāroñ taraf apne ki tamāshā kyā hai

le ke is bazm meñ tū dīda-e-bīnā aayā

muñh pe āshiq ke mohabbat kī shikāyat nāseh

baat karne kā bhī nādāñ na qarīnā aayā

kis tarah milte haiñ bichhḌoñ se dikhā deñge kabhī

dil meñ vo tiir agar chiir ke siinā aayā

Dhaal kar dete haiñ kis ko kise be-Dhāle hue

mere saaqī ko to ye bhī na qarīnā aayā

zindagī karte haiñ kis tarah ye sīkho is vaqt

'shād' kyā naf.a agar marne pe jiinā aayā

le ke KHud pir-e-mughan hath mein mina aaya

mai-kasho sharm ki is par bhi na pina aaya

na pilana kisi mai-kash ko na pina aaya

tujh ko zahid agar aaya bhi to kina aaya

umr bhar KHun-e-jigar baiTh ke pina aaya

aarzuo tumhein marna hamein jina aaya

dil ne dekha mujhe aur main ne falak ko dekha

bach ke sahil pe agar koi safina aaya

kisi badmast ki yaad aa gain aankhen saqi

jab chhalakta hua aage mere mina aaya

ek zara si thi kabhi ki KHalish us par ai hashr

dil mein leta hua zahid wahi kina aaya

laDkhaDana koi sikha koi sikha masti

hum ko aaya to faqat Dhaal ke pina aaya

KHush ho ai chashm ki hai fasl yahi rone ki

muzhda ai abr ki sawan ka mahina aaya

pi hi leni thi jo mai-KHane ko aa nikla tha

tujh ko sohbat ka bhi zahid na qarina aaya

chaha jo kuchh wo zamane ne kiya naqsh is par

main to sada liye is dil ka nagina aaya

aaj tak daman-e-gul chaak hai KHayyat-e-azal

tujh ko KHilat bhi hasinon ka na sina aaya

dekh chaaron taraf apne ki tamasha kya hai

le ke is bazm mein tu dida-e-bina aaya

munh pe aashiq ke mohabbat ki shikayat naseh

baat karne ka bhi nadan na qarina aaya

kis tarah milte hain bichhDon se dikha denge kabhi

dil mein wo tir agar chir ke sina aaya

Dhaal kar dete hain kis ko kise be-Dhaale hue

mere saqi ko to ye bhi na qarina aaya

zindagi karte hain kis tarah ye sikho is waqt

'shad' kya nafa agar marne pe jina aaya