lijiye tabani-e-alam ke saman ho gae

lījiye tābānī-e-ālam ke sāmāñ ho ga.e

dil ke zarre uḌ ke har jānib pareshāñ ho ga.e

dard-e-tanhā.ī se mar jaanā to kuchh mushkil na thā

kyā kaheñ ġham se magar kuchh ahd-o-paimāñ ho ga.e

iltifāt-e-dost kā mumkin nahīñ koī sila

kam hai jān-o-dil jo sarf-e-shukr-e-ehsāñ ho ga.e

tujh se kyā leñ intiqām ai ḳhāk-e-be-barg-o-navā

vo kahāñ haiñ mehr-o-mah tujh meñ jo pinhāñ ho ga.e

dāvat-e-jalva hai phir barq-e-nigāh-e-nāz ko

jam.a phir hastī ke ajzā-e-pareshāñ ho ga.e

ab maiñ samjhā sīna-e-sozāñ ke shaq hone kā raaz

aap pinhāñ kyā hue goyā numāyāñ ho ga.e

jin ko honā hī na thā rāh-e-mohabbat meñ ġhubār

kis tarah vo ḳhaak ke putle phir insāñ ho ga.e

ḳhāk-e-dil ke chand zarre uḌ ga.e the ek din

ban ke taare āsmānoñ par daraḳhshāñ ho ga.e

kuchh ḳhayāl-e-dost aayā thā ki aa pahuñchī bahār

jis taraf dekhā gulistāñ hī gulistāñ ho ga.e

husn ne roz-e-azal jab ruḳh se sarkā.ī naqāb

chand jalve rañg ban kar bazm-e-imkāñ ho ga.e

chhā rahā hai rañg har jānib bahār-e-husn kā

vā haiñ jin ke dīda-e-dil gul-badāmāñ ho ga.e

rafta rafta ārzū-e-rastagārī miT ga.ī

rah ke zindāñ meñ 'jigar' āzād-e-zindāñ ho ga.e

lijiye tabani-e-alam ke saman ho gae

dil ke zarre uD ke har jaanib pareshan ho gae

dard-e-tanhai se mar jaana to kuchh mushkil na tha

kya kahen gham se magar kuchh ahd-o-paiman ho gae

iltifat-e-dost ka mumkin nahin koi sila

kam hai jaan-o-dil jo sarf-e-shukr-e-ehsan ho gae

tujh se kya len intiqam ai KHak-e-be-barg-o-nawa

wo kahan hain mehr-o-mah tujh mein jo pinhan ho gae

dawat-e-jalwa hai phir barq-e-nigah-e-naz ko

jama phir hasti ke ajza-e-pareshan ho gae

ab main samjha sina-e-sozan ke shaq hone ka raaz

aap pinhan kya hue goya numayan ho gae

jin ko hona hi na tha rah-e-mohabbat mein ghubar

kis tarah wo KHak ke putle phir insan ho gae

KHak-e-dil ke chand zarre uD gae the ek din

ban ke tare aasmanon par daraKHshan ho gae

kuchh KHayal-e-dost aaya tha ki aa pahunchi bahaar

jis taraf dekha gulistan hi gulistan ho gae

husn ne roz-e-azal jab ruKH se sarkai naqab

chand jalwe rang ban kar bazm-e-imkan ho gae

chha raha hai rang har jaanib bahaar-e-husn ka

wa hain jin ke dida-e-dil gul-badaman ho gae

rafta rafta aarzu-e-rastagari miT gai

rah ke zindan mein 'jigar' aazad-e-zindan ho gae