likh kar waraq-e-dil se miTane nahin hote

likh kar varaq-e-dil se miTāne nahīñ hote

kuchh lafz haiñ aise jo purāne nahīñ hote

jab chāhe koī phūñk de ḳhvāboñ ke nasheman

āñkhoñ ke ujaḌne ke zamāne nahīñ hote

jo zaḳhm azīzoñ ne mohabbat se diye hoñ

vo zaḳhm zamāne ko dikhāne nahīñ hote

ho jaa.e jahāñ shaam vahīñ un kā baserā

āvāra parindoñ ke Thikāne nahīñ hote

be-vaj.h ta.alluq koī be-nām rifāqat

jiine ke liye kam ye bahāne nahīñ hote

kahne ko to is shahr meñ kuchh bhī nahīñ badlā

mausam magar ab utne suhāne nahīñ hote

siine meñ kasak ban ke base rahte haiñ barsoñ

lamhe jo palaT kar kabhī aane nahīñ hote

āshufta-sarī meñ hunar-e-harf-o-navā kyā

lafzoñ meñ bayāñ ġham ke fasāne nahīñ hote

'maḳhmūr' ye ab kyā hai ki bār-e-ġham-e-dil se

bojhal mire ehsās ke shāne nahīñ hote

likh kar waraq-e-dil se miTane nahin hote

kuchh lafz hain aise jo purane nahin hote

jab chahe koi phunk de KHwabon ke nasheman

aankhon ke ujaDne ke zamane nahin hote

jo zaKHm azizon ne mohabbat se diye hon

wo zaKHm zamane ko dikhane nahin hote

ho jae jahan sham wahin un ka basera

aawara parindon ke Thikane nahin hote

be-wajh talluq koi be-nam rifaqat

jine ke liye kam ye bahane nahin hote

kahne ko to is shahr mein kuchh bhi nahin badla

mausam magar ab utne suhane nahin hote

sine mein kasak ban ke base rahte hain barson

lamhe jo palaT kar kabhi aane nahin hote

aashufta-sari mein hunar-e-harf-o-nawa kya

lafzon mein bayan gham ke fasane nahin hote

'maKHmur' ye ab kya hai ki bar-e-gham-e-dil se

bojhal mere ehsas ke shane nahin hote