likh likh ke aansuon se diwan kar liya hai

likh likh ke āñsuoñ se dīvān kar liyā hai

apne suḳhan ko apnī pahchān kar liyā hai

āḳhir haTā diiñ ham ne bhī zehn se kitābeñ

ham ne bhī apnā jiinā āsān kar liyā hai

duniyā meñ āñkheñ kholī haiñ mūñdne kī ḳhātir

aate hī lauTne kā sāmān kar liyā hai

sab log is se pahle ki devtā samajhte

ham ne zarā sā ḳhud ko insān kar liyā hai

jin nekiyoñ pe chal kar ajdād kitne ḳhush the

ham ne unhī pe chal kar nuqsān kar liyā hai

har baar apne dil kī bāteñ zabāñ pe lā kar

ham ne musībatoñ ko mehmān kar liyā hai

aksar huā hai marne kī maañg kar duā.eñ

phir ham ne zindagī kā armān kar liyā hai

ik dil ke TūTne par rotā hai koī itnā

jhoñke ko ḳhud hamīñ ne tūfān kar liyā hai

sochā bhī hai ki daanā banñe kī koshishoñ meñ

kyā haal apnā tū ne nādān kar liyā hai

kuchh is tarah guzārā hai zindagī ko ham ne

jaise ki ḳhud pe koī ehsān kar liyā hai

likh likh ke aansuon se diwan kar liya hai

apne suKHan ko apni pahchan kar liya hai

aaKHir haTa din hum ne bhi zehn se kitaben

hum ne bhi apna jina aasan kar liya hai

duniya mein aankhen kholi hain mundne ki KHatir

aate hi lauTne ka saman kar liya hai

sab log is se pahle ki dewta samajhte

hum ne zara sa KHud ko insan kar liya hai

jin nekiyon pe chal kar ajdad kitne KHush the

hum ne unhi pe chal kar nuqsan kar liya hai

har bar apne dil ki baaten zaban pe la kar

hum ne musibaton ko mehman kar liya hai

aksar hua hai marne ki mang kar duaen

phir hum ne zindagi ka arman kar liya hai

ek dil ke TuTne par rota hai koi itna

jhonke ko KHud hamin ne tufan kar liya hai

socha bhi hai ki dana banne ki koshishon mein

kya haal apna tu ne nadan kar liya hai

kuchh is tarah guzara hai zindagi ko hum ne

jaise ki KHud pe koi ehsan kar liya hai