liya hai ishq ne kya intiKHab kar ke mujhe

liyā hai ishq ne kyā intiḳhāb kar ke mujhe

chunā jo bazm meñ jām-e-sharāb kar ke mujhe

ḳhatā-o-jurm pe mujh ko bahut nadāmat thī

diyā jo ḳhuld meñ jā be-hisāb kar ke mujhe

tumhāre naqsh-e-qadam se ye aa rahī hai sadā

qadam ne chhoḌ diyā ham-rikāb kar ke mujhe

ḳhatā nahīñ hai mirī ai sanam maiñ kyā kartā

biThāyā dasht meñ dil ne azaab kar ke mujhe

ye ḳhāk-e-āshiq-e-ġhamgīñ se aa rahī hai sadā

qazā chalī ga.ī masrūf-e-ḳhvāb kar ke mujhe

ḳhudā kī shaan to dekho ki un ke gulshan meñ

nasīm le ga.ī bū-e-gulāb kar ke mujhe

banāyā sajda-gah-e-ins-o-jinn dilā ne mire

'jamīla' sañg-e-dar-e-bū-turāb kar ke mujhe

liya hai ishq ne kya intiKHab kar ke mujhe

chuna jo bazm mein jam-e-sharab kar ke mujhe

KHata-o-jurm pe mujh ko bahut nadamat thi

diya jo KHuld mein ja be-hisab kar ke mujhe

tumhaare naqsh-e-qadam se ye aa rahi hai sada

qadam ne chhoD diya ham-rikab kar ke mujhe

KHata nahin hai meri ai sanam main kya karta

biThaya dasht mein dil ne azab kar ke mujhe

ye KHak-e-ashiq-e-ghamgin se aa rahi hai sada

qaza chali gai masruf-e-KHwab kar ke mujhe

KHuda ki shan to dekho ki un ke gulshan mein

nasim le gai bu-e-gulab kar ke mujhe

banaya sajda-gah-e-ins-o-jinn dila ne mere

'jamila' sang-e-dar-e-bu-turab kar ke mujhe