log bante hain hoshiyar bahut

log bante haiñ hoshiyār bahut

varna ham bhī the ḳhāksār bahut

ghar se be-tesha kyuuñ nikal aa.e

rāste meñ haiñ kohsār bahut

tujh se bichhḌe to ai nigār-e-hayāt

mil ga.e ham ko ġham-gusār bahut

haath shal ho ga.e shanāvar ke

ab ye dariyā hai be-kanār bahut

ham faqīroñ ko kam nazar aa.e

is nagar meñ the shahryār bahut

us ne majbūr kar diyā varna

ham ko ḳhud par thā iḳhtiyār bahut

ham hī apnā samajh rahe the use

ho ga.e ham hī sharmsār bahut

log bante hain hoshiyar bahut

warna hum bhi the KHaksar bahut

ghar se be-tesha kyun nikal aae

raste mein hain kohsar bahut

tujh se bichhDe to ai nigar-e-hayat

mil gae hum ko gham-gusar bahut

hath shal ho gae shanawar ke

ab ye dariya hai be-kanar bahut

hum faqiron ko kam nazar aae

is nagar mein the shahryar bahut

us ne majbur kar diya warna

hum ko KHud par tha iKHtiyar bahut

hum hi apna samajh rahe the use

ho gae hum hi sharmsar bahut