log har baat ko afsana bana dete hain

log har baat ko afsāna banā dete haiñ

hosh-mandoñ ko bhī dīvāna banā dete haiñ

zikr karte haiñ tire husn kā jis dam ham log

chāñdnī raat ko afsāna banā dete haiñ

terī maḳhmūr nigāhoñ se zarā sī pī kar

ham to har chiiz ko mai-ḳhāna banā dete haiñ

kuchh to pahle hī kiyā 'ishq ne pāgal dil ko

aur kuchh log bhī dīvāna banā dete haiñ

husn kī sham' ko vo karte haiñ aise raushan

'ishq ko aate hī parvāna banā dete haiñ

ham vo mai-ḳhvār haiñ jo dekh ke tujh ko 'sāqī'

mai-kade ko bhī sanam-ḳhāna banā dete haiñ

log har baat ko afsana bana dete hain

hosh-mandon ko bhi diwana bana dete hain

zikr karte hain tere husn ka jis dam hum log

chandni raat ko afsana bana dete hain

teri maKHmur nigahon se zara si pi kar

hum to har chiz ko mai-KHana bana dete hain

kuchh to pahle hi kiya 'ishq ne pagal dil ko

aur kuchh log bhi diwana bana dete hain

husn ki sham' ko wo karte hain aise raushan

'ishq ko aate hi parwana bana dete hain

hum wo mai-KHwar hain jo dekh ke tujh ko 'saqi'

mai-kade ko bhi sanam-KHana bana dete hain