log jo dil-figar hote hain

log jo dil-figār hote haiñ

chalte phirte mazār hote haiñ

jo mohabbat meñ ḳhaar hote haiñ

sāhab-e-sad-vaqār hote haiñ

jin ke dāman meñ ḳhaar hote haiñ

qadr-dān-e-bahār hote haiñ

jo mohabbat-shi.ār hote haiñ

sāzishoñ kā shikār hote haiñ

merī barbādī-e-mohabbat par

aap kyoñ sharmsār hote haiñ

un ke qaul-o-qarār kyā kahiye

sirf qaul-o-qarār hote haiñ

apnā matlab nikālne vaale

kis qadar hoshiyār hote haiñ

pur-ḳhulūsoñ kī pūchhte kyā ho

ḳhaar hote the ḳhaar hote haiñ

kyā ḳhabar thī ki rāh-e-ulfat meñ

har qadam ḳhārzār hote haiñ

kis tavaqqo pe log ai 'āsī'

zindagī par nisār hote haiñ

log jo dil-figar hote hain

chalte phirte mazar hote hain

jo mohabbat mein KHar hote hain

sahab-e-sad-waqar hote hain

jin ke daman mein KHar hote hain

qadr-dan-e-bahaar hote hain

jo mohabbat-shiar hote hain

sazishon ka shikar hote hain

meri barbaadi-e-mohabbat par

aap kyon sharmsar hote hain

un ke qaul-o-qarar kya kahiye

sirf qaul-o-qarar hote hain

apna matlab nikalne wale

kis qadar hoshiyar hote hain

pur-KHuluson ki puchhte kya ho

KHar hote the KHar hote hain

kya KHabar thi ki rah-e-ulfat mein

har qadam KHarzar hote hain

kis tawaqqo pe log ai 'asi'

zindagi par nisar hote hain